Meta l-bieraħ beda jintlagħab l-ewwel leg tal-play-offs għall-Aħħar 16 tal-UEFA Champions League, Paris St-Germain u Borussia Dortmund għamlu pass kbir lejn il-kwalifikazzjoni meta rebħu barra minn darhom bl-iskor identiku ta’ 3-0.
Min-naħa l-oħra, Real Madrid rebħu lil Manchester City bl-iskor ta’ 3-2 biex issa għandhom vantaġġ tajjeb meta jilagħbu f’darhom, jiġifieri, fil-Bernabeu Stadium.
Man City v Real Madrid – Real Madrid għelbu lil Manchester City fl-Etihad Stadium bl-iskor ta’ 3-2.
Kienu s-City li fetħu l-iskor fid-19-il minuta meta Jack Grealish għadda lejn Josko Gvardiol li niżżel il-ballun b’sidru lil Erling Haaland li antiċipa l-ħarġa tal-goalkeeper, Thibaut Courtois, billi xeħet fir-rokna tax-xibka.
Minuta mill-ftuħ tat-tieni taqsima, is-City resqu ferm viċin li jirduppjaw iżda x-xutt ta’ Haaland ġie devjat minn Eduardo Camavinga għal fuq il-mimduda.
Mandankollu kien Kylian Mbappe (60) li kiseb id-draw għal Real minkejja li laqat il-ballun ħażin li qarraq għal kollox bil-goalkeeper Ederson.
Peró, Erling Haaland (80) skorja l-goal tar-rebħa minn penalty wara foul ta’ Dani Ceballos fuq Phil Foden.
Iżda Brahim Diaz (86) u Jude Bellingham (93) dawru r-riżultat favur Real Madrid.
Juventus v PSV – Juventus issuperaw lil PSV Eindhoven bl-iskor ta’ 2-1.
Il-Bianconeri fetħu l-iskor fl-34 minuta, meta Weston McKennie ikkontrolla l-ballun fil-kaxxa opposta u b’xutt qawwi għeleb għal kollox lill-goalkeeper, Walter Benitez.
Iżda, Ivan Perisic (56) kiseb id-draw għall-Olandiżi.
Madankollu, it-team immexxi mill-coach, Thiago Motta, ħareġ rebbieħ grazzi għal goal tas-sostitut Samuel Mbangula (82) li approfitta minn żball tal-goalkeeper Benitez.
Sporting v Borussia D. – Borussia Dortmund marru għand Sporting u ħarġu rebbieħa 3-0, bit-tliet goals jaslu minn Serhou Guirassy (60), Pascal Gross (65) u Karim Adeyemi (82).
Brest v Paris SG– Fid-derby ta’ Franza, barra minn darhom, Paris St-Germain għelbu lil Brest bl-iskor ta’ 3-0.
It-tliet goal waslu minn penalty ta’ Vitinha (21) u doppjetta ta’ Ousmane Dembele (45, 66).
