Shamrock R. ……3
Hibernians ………0
Hibernians bdew l-impenji tagħhom fil-UEFA Champions League fuq nota negattiva meta fl-ewwel round ta’ kwalifikazzjoni sfaw megħluba minn Shamrock Rovers bl-iskor ta’ 3-0 għalkemm dan ir-riżultat jista’ jitqies bħala wieħed kiefer għalihom.
L-Irlandiżi mill-ewwel ħarġu fuq l-offensiva biex isibu goal kmieni u fil-11-il minuta, huma resqu ferm viċin li jiftħu l-iskor meta x-xutt minn barra l-kaxxa ta’ Dylan Watts għeleb għal kollox lill-goalkeeper Ibrahim Kone, li iżda, b’xorti tajba l-ballun għadda jħakkek ma’ sieq il-lasta.
Aktar ma beda jgħaddi l-ħin, Shamrock komplew iżidu l-pressjoni bil-Pawlisti jkunu konstretti li jirtiraw lura u joperaw bil-kontrattakki.
Fit-18-il minuta, il-Greens reġgħu heddew iżda minn pożizzjoni tajba, id-daqqa ta’ ras ta’ Sean Hoare spiċċat barra. Peró fil-25 minuta, huma fetħu l-iskor meta minn attakk korali, Rory Gaffney xeħet lejn Ronan Finn li kien ġej bil-ġirja u bil-kalma kollha xeħet il-ballun fix-xibka.
Hibernians għamlu reazzjoni u tliet minuti wara, Jurgen Degabriele xeħet fit-tul lejn Dunstan Vella iżda d-daqqa ta’ ras tiegħu spiċċat f’idejn il-goalkeeper.
Hekk kif il-Pawlisti taw l-impressjoni li kienu se jibdew jaqsmu l-logħob mal-avversarji, fl-40 minuta, Shamrock irduppjaw meta Gaffney xeħet cross fil-baxx lejn Dylan Watts li xeħet fir-rokna tax-xibka.
It-tieni taqsima fetħet fuq nota pożittiva meta fit-52 minuta, minn azzjoni mejta s-sostitut, Terence Groothusen, kien għoddu naqqas il-marġni tal-iskor meta minn 35 metru bogħod għeleb lil Alan Mannus iżda ġie mċaħħad mill-mimduda. Fit-62 minuta, Degabriele żmarka għal kollox lil Thaylor iżda waħdu ra l-ballun jaħbat ma’ sieq il-lasta.
Peró, fit-76 minuta, Shamrock għamluhom tlieta meta Emakhu żmarka lil Rory Gaffney li qabad id-difiża Pawlista fuq sieq waħda, avvanza u tefa’ fir-rokna tax-xibka … meta suppost intwera l-karta l-ħamra għal ritaljazzjoni fuq Gabriel Izquier, fis-70 minuta.
Shamrock R: 1-Alan Mannus, 3-Sean Hoare, 4-Roberto Lopes, 5-Lee Grace, 7-Dylan Watts (17-Richard Towell 81), 8-Ronan Finn (2-Sean Gannon 81), 9-Aaron Greene (38-Aidomo Emakhu 67), 16-Gary ONeill, 20-Rory Gaffney (21-Justin Ferizaj 85), 22-Andy Lyons, 26-Chris McCann – Coach: Stephen Bradley
Hibernians: 24-Ibrahim Kone, 6-Gonzalo Llerena, 10- Jurgen Degabriele, 12-Dunstan Vella, 13-Zachary Grech (21-Lukas Caruana 89), 17-Gabriel Mensah (9-Terence Groothusen 46), 18-Thaylor Aldama (7-Ayrton Attard 81), 19-Joseph Zerafa (4-Lorenzo Fonseca 89), 22-Gabi Izquier, 88-Rodolfo Soares – Coach: Ryan Pulis
Referees: Morten Krogh (Danimarka)
Assistenti: Jesper Dahl, Lars Hummelgaard (Danimarka)
Raba’ Uffiċjal: Mikkel Redder (Danimarka)
Skorers: R. Finn 25, D. Watts 40, R. Gaffney 76 (SR)
Ammoniti: J. Zerafa, G. Izquier (H); R. Gaffney (SR)
