Illum, Gzira United jieħdu magħhom vantaġġ ta’ 2-0 għand F91 Dudelange tal-Lussemburgu liema partita hija valida mit-tieni leg tat-tieni round tal-UEFA Conference League.
Dawn iż-żewġ goals tal-Maroons waslu fit-tieni taqsima tal-ewwel leg li ntlagħab fis-Centenary Stadium, il-ġimgħa l-oħra. L-awturi tal-goals kienu Lucas Macula u Zach Scerri li fajjar xutt mid-distanza li ma l-ebda ċans lill-goalkeeper avversarju jsalva.
Minkejja dan l-iskor, il-Gżirjani jridu joqogħdu attenti minħabba li Dudelange mhumiex team ħażin hekk kif fil-logħba preċedenti ħolqu bosta ċansijiet ta’ skor iżda sabu lill-goalkeeper, David Cassar, attent bejn il-lasti.
Iżda fuq kollox, il-Maroons jibdew favoriti li jaqtgħu l-passaġġ għat-tielet round ta’ kwalifikazzjoni. Jekk ikunu huma li jiftħu l-iskor … jagħmlu pass kbir lejn ir-round li jmiss.
Għal dan il-konfront, jirritorna l-coach Darren Abdilla fuq il-bank wara li kien sospiż fejn assuma r-responsabbiltajiet tiegħu l-assistent Andrew Cohen.
Min-naħa tal-coach ta’ Dudelange, Carlos Fanguiero, jinsab konxju li se tkun missjoni diffiċli u biex jirkupra ż-żewġ goals żvantaġġ irid juża tattika offensiva iżda fl-istess waqt irid jaddatta waħda difensiva minħabba li Gzira għandhom kontrattakk b’saħħtu.
Il-coach Abdilla ma għandu l-ebda problemi ta’ players neqsin u għaldaqstant mistenni jinżel bl-istess formazzjoni li biha beda kontra l-istess Dudelange, il-ġimgħa l-oħra.
Biex waslu sa din il-fażi, Gżira United eliminaw lil Glentoran FC tal-Irlanda ta’ Fuq fejn wara draw ta’ 2-2 f’Malta, wasal draw ieħor ta’ 1-1 f’Belfast bil-logħba tiġi deċiża bl-għoti tal-penalties fejn il-Maroons ħarġu rebbieħa bl-iskor ta’ 14-13.
Min-naħa tagħhom, Dudelange għelbu lil St Patrick’s tal-Irlanda, bl-aggregate ta’ 5-3 (2-1, 3-2).
Il-logħba se tintlagħab fi Stade Jos Nosbaum, f’Dudelange, li jinsab fin-nofsinhar tal-Lussemburgu.
Ir-rebbieħ ta’ dan il-konfront jilgħab fit-tielet round ta’ kwalifikazzjoni ta’ din il-kompetizzjoni kontra r-rebbieħ bejn FC Viktoria Plzen tar-Repubblika Ċeka u FC Drita tal-Kosovo.
