Gzira United …….0
Viktoria Plzen …..2
(Aggregate: Viktoria Plzen 6-0)
Kienet missjoni kważi impossibbli għal Gzira United li jgħaddu għall-play-off meta fit-tieni leg tat-tielet round ta’ kwalifikazzjoni tal-UEFA Conference League sfaw megħluba minn Viktoria Plzen bl-iskor ta’ 2-0 għall-aggregate ta’ 6-0.
Kienu Viktoria Plzen li ħolqu l-ewwel periklu fit-18-il minuta meta f’azzjoni veloċi, Jan Kliment għadda tajjeb lejn Ibrahim Traore li kellu l-konklużjoni tiegħu tiġi devjata f’corner minn difensur tal-Maroons.
Gzira wieġbu fit-28 minuta permezz ta’ xutt fil-baxx kważi minn tarf il-kaxxa ta’ Farid Romero Zuniga li għadda jħakkek ma’ sieq il-wieqfa.
Fit-33 minuta, reġgħu kienu Plzen li ħolqu l-periklu meta Pavel Sulc, minn pożizzjoni ferm ideali, kellu x-xutt tiegħu jaħbat max-xibka minn barra, biex b’hekk ta l-illużjoni tal-goal.
Iżda kienu Gzira li resqu ferm viċin li jiftħu l-iskor tliet minuti wara meta Lucas Macula wara li kkontrolla tajjeb, kellu x-xutt b’saħħtu tiegħu minn ġol-kaxxa, jiġi devjat f’corner bi bravura mill-goalkeeper Martin Jedicka.
Fil-ftuħ tat-tieni taqsima, Plzen, ħarġu ferm aggressivi u ta’ dan ġew ippremjati meta fis-46 minuta, fetħu l-iskor, hekk kif Jan Paluska xeħet cross lejn Jhon Mosquera, li min-naħa tiegħu niżżel bir-ras lejn IBRAHIM TRAORE li żmarkat f’nofs il-kaxxa tefa’ ġewwa.
Huma komplew fuq l-offenisva u żewġ minuti biss wara, Solk għadda tajjeb lejn Libor Holik li kellu t-tenattiv mill-viċin tiegħu jistampa mal-mimduda.
Gzira wieġbu fis-57 minuta meta Zachary Scherri għadda tajjeb lejn Thiago Espindola, li kellu x-xutt tiegħu mix-xellug, jaħbat max-xibka minn barra.
Madankollu, kienu Plzen, li rduppjaw l-iskor fis-70 minuta, permezz ta’ xutt minn tarf il-kaxxa ta’ ADAM VKANOVA, li ma ta l-ebda ċans lil David Cassar, bil-ballun jintemm fir-rokna tax-xibka.
Plzen komplew jamministraw il-vantaġġ doppju li kellhom sa tmiem il-partita.
Peró anke, jekk sfaw eliminati, il-Maroons għandhom għax ikunu kburin li waslu sa dan l-istadju u bil-potenzjal li għandhom se jkun forza qawwija għall-kampjonat.
GZIRA U.: 1-David Cassar, 93-Thiago Espindola, 3-Gabriel Bohrer Mentz, 2-Carlos Chaba (6-Bilario Azizi 65), 9-Marcelo Dias, 8-Zachary Scerri (15-Hytem Kabar 90), 4-Andy Borg, 20-Farid Romero Zuniga, 11-Lucas Macula (26-Mohamed Alouzi 89), 47-Brooklyn Borg (99-Izaak Ellul 90), 14-Luis Carlos Riascos (74-Jose Wilkson Teixeira 73) – Coach: Darren Abdilla
VIK. PLZEN: 16-Martin Jedicka, 44-Libor Holik, 3-Robin Hranac, 21-Vaclav Jemelka, 18-Jhon Mosquera, 12-Ibrahim Traore (20-Pavel Bucha 63), 5-Jan Paluska, 23-Lukas Kalvach (40-Sampson Dweh 73), 88-Adam Vkanova, 9-Jan Kliment (10-Jan Kopic 78), 31-Pavel Sulc (17-Rafiu Durosinmi 63) – Coach: Miroslav Koubek
REFEREE: Denys Shurman (Ukrajna)
ASS. REFEREES: Semen Shlonchak, Volodymyr Vysotskyi (Ukrajna)
RABA’ UFF: Dmytro Panchyshyn (Ukrajna)
SKORERS: I. Traore 46, A. Vkanova 70 (VP)
AMMONITI: M. Dias, J. Wilkson Teixeira (GU)
