Ferencvaros ……………2
Hamrun Spartans …….1
(Aggregate: Ferencvaros 8-2)
L-avventura ta’ Hamrun Spartans fl-Ewropa ġiet fi tmiemha meta fit-tieni leg tat-tielet round ta’ kwalifikazzjoni tal-UEFA Conference League sfaw megħluba minn Ferencvaros bl-iskor ta’ 2-1 għall-aggregate ta’ 8-2.
Il-partita fetħet b’xutt minn tarf il-kaxxa ta’ Mohammed Abu Fani li iżda kien wisq ċentrali biex il-goalkeeper, Federico Marchetti, salva mingħajr wisq tbatija.
Iżda fis-sitt minuta, fl-ewwel attakk denju, Hamrun Spartans fetħu l-iskor meta Luke Montebello xeħet cross minn fuq ix-xellug fejn sab lil Joseph Mbong li tbiegħed mill-kustodja tad-difensur dirett tiegħu u b’first timer bid-dawra għeleb għal kollox lill-goalkeeper Adam Varga.
L-Ungeriżi għamlu reazzjoni u fil-11-il minuta resqu viċin li jiksbu d-draw meta Emerson Marcelina tilef il-pussess tal-ballun li wasal għand Barnabas Varga li l-lob tiegħu għadda jħakkek mal-wieqfa.
Fis-27 minuta, mill-free-kick ta’ Abu Fani, Mbong kien għoddu kkommetta auto-goal iżda Marchetti kien ferm attent fuq il-linja tiegħu.
Fit-33 minuta, reġa’ kien Abu Fani li mpenja lil Marchetti b’xutt fil-baxx minn barra l-kaxxa, bil-goalkeeper Ħamruniż jinxteħet minn tulu biex evita kull periklu.
Fit-38 minuta, il-Ħamruniżi kienu kostretti li jagħmlu sostituzzjoni sfurzata meta weġġa’ Mbong biex fil-post tiegħu daħal Ryan Camenzuli.
Erba’ minuta wara, Ferencvaros kisbu d-draw meta Varga ħarab lil Nemanja Kristic u dendel cross perfett fuq Adama Traore li b’daqqa ta’ ras b’saħħitha xeħet il-ballun fix-xibka.
Minuta mill-ftuħ tat-tieni taqisma, il-goalkeeper Varga kien providenzjali meta ħareġ minn postu biex antiċipa fil-ħin lil Camenzuli li kien ġej bil-ġirja minn pożizzjoni angolata.
Fuq in-naħa l-oħra, fit-53 minuta, Ferencvaros kienu sfortunati li marrux fil-vantaġġ meta minn tliet kwarti ta’ ground, Siger fajjar kanunata li għelbet lil Marchetti iżda ġiet miżmuma mill-mimduda.
Fit-58 minuta, l-Ungeriżi appellaw għal penalty meta Juan Corbolan deher imiss il-ballun b’idu iżda kollox kien normali għar-referee. Sitt minuti wara, reġgħu pprotestaw għal penalty ieħor iżda s-sostitut Krisztian Lisztes aċċentwa l-waqgħa meta għadda minn ħdejn Marcelina.
Fid-69 minuta, il-Greens marru fil-vantaġġ meta Marquinhos daħal fil-kaxxa, għadda minn fuq Bjelicic u xeħet fil-baxx lejn Barnabas Varga li rtokka l-ballun fix-xibka.
Tliet minuti wara, kien Marchetti li dawwar il-ballun għal corner mill-free-kick insidjuż ta’ Abu Fani … u fil-75 l-istess Marchetti wettaq save kbir fuq Lisztes minn taħt il-lasti.
Fl-aħħar kwarta l-andament kien wieħed bilanċjat biex iż-żewġ goalkeepers ma ġewx impenjati serjament.
Ferencvaros: 1-Adam Varga, 4-Mats Knoester (M Abena 74), 10-Tokmac Nguen (50-Marquinhos 61), 15-Mohammed Abu Fani (14-Amer Gojak 81, 16-Kristoffer Zachariassen, 18-David Siger, 19-Barnabas Varga, 20-Adama Traore (76-Krisztian Lisztes 61), 23-Lorand Paszka, 27-Ibrahim Cisse, 31-Henry Wingo (17-Eldar Civic 46) – Coach: Csaba Mate
Hamrun S.: 12-Federico Marchetti, 7-Luke Montebello (98-Jonny 63), 10-Joseph Mbong (94-Ryan Camenzuli 38), 14-Elionay (77-Shaisen Attard 80), 17-Yuliyan Nenov, (25-Eder 63) 27-Ognjen Bjelicic, 28-Juan Corbolan, 30-Seth Paintsil (4-Steve Borg 80), 42-Nemanja Krstic, 69-Karlo Bilic, 91-Marcelina Emerson – Coach: Luciano Zauri
Referee: Georgi Davidov (Bulgarija)
Assistenti: Martin Venev, Petar Velizarov Mitrev (Bulgarija)
Raba’ Uff: Georgi Ginchev (Bulgarija)
Skorers: J. Mbong 6 (HS); A. Traore 42, B. Varga (F)
Ammoniti: J. Mbong, O. Bjelicic, J. Corbolan (HS)
