Hamrun Spartans u Gzira United illum ikunu nvoluti fl-ewwel leg tat-tielet round tal-UEFA Conference League kontra Ferencvaros tal-Ungerija u Viktoria Plzen tar-Repubblika Ċeka liema partiti huma kemmxejn diffiċli.
Hamrun Spartans jibdew l-impenn tagħhom fl-Istadium Nazzjonali.
Huma waslu sa dan l-istadju wara li warrbu l-isfida ta’ Dinamo Tbilisi bl-aggregate ta’ 3-1 (2-1, 1-0).
Għal dan il-konfront huma se jkunu mingħajr is-sospiż, Uros Djuranovic, li wara li skorja l-uniku goal fi Tbilisi, huwa ntwera l-karta l-ħamra wara argument jaħraq mal-coach avversarju waqt il-mistrieħ fi triqithom lejn id-dressing rooms … biex il-Ħamruniżi kellhom jilagħbu għal taqsima sħiħ bi player inqas.
Min-naħa tagħhom, Ferencvaros huma “klijenti regolari” għall-Maltin fil- kompetizzjonijiet Ewropej hekk kif din se tkun il-ħames żjara f’pajjiżna.
L-erba’ darbiet preċedenti kienu kontra erba’ timijiet differenti f’erba’ kompetizzjonijiet differenti.
Kontra Floriana fl-1972-73 li huma tilfu 1-0 u rebħu 6-0 f’Budapest bil-kompetizzjoni kienet it-Tazza tat-Tazzi. Dak iż-żmien huma kellhom lill-attakkant Florian Albert li kien għamel isem mat-team nazzjonali.
Birkirkara ltaqgħu magħhom fl-istaġun 2003-04 fit- Tazza UEFA fejn sofrew żewġ telfiet, 5-0 u 1-0.
Imbagħad kien imiss lil Sliema Wanderers meta fl-Europa League tal-istaġun 2014-15, it-team Ungeriż ġie draw 1-1 f’Ta’ Qali u rebaħ 2-1 f’pajjiżu bl-iskor aggregate jkun l-aħjar mit-timijiet Maltin kontrihom.
L-aħħar li Ferencvaros lagħbu kontra team Malti kien fiċ-Champions League tal-istaġun 2019-20 meta ltaqgħu kontra Valletta fejn ġew draw 1-1 f’Malta u rebħu 3-1 fl-Ungerija.
Il-partita tibda fit-8.00 pm
