Minn Cristian Muscat
Floriana ……….0
Petrocub ………0
Fl-ewwel leg tal-ewwel round ta’ kwalifikazzjoni tal-UEFA Conference League, Floriana temmew fi draw ta’ mingħajr goals kontra Petrocub Hincesti tal-Moldova.
Minkejja li l-Greens iddominaw għal kollox lill-avversarji tagħhom, huma ma setgħux isibu t-triq lejn ix-xibka.
Dan minħabba li l-Moldovani ffullaw id-difiża fit-tentattiv li jimblukkaw kull attakk Furjaniż liema pjan irnexxa fil-massimu tiegħu.
B’dan ir-riżultat, issa Petrocub huma favoriti li jkomplu javvanzaw f’din il-kompetizzjoni meta l-ġimgħa d-dieħla jilagħbu t-tieni leg f’darhom … peró jekk il-Greens juru l-istess prestazzjoni ma tkun l-ebda sorpriża li jaqtgħu l-passaġġ għar-round li jmiss.
Floriana utilizzaw sistema ta’ 3-4-3, waqt li Petrocub-Hincesti addottaw sistema ta’ 5-3-2.
Il-Greens kellhom nieqes lid-difensur Zachary Cassar li jinsab imweġġa’.
Kienu Floriana li ħarġu fuq l-offensiva u wara biss minuta, Kemar Reid kellu x-xutt tiegħu minn pożizzjoni ideali mdawwar f’corner mill-goalkeeper Cristian Avram.
Fis-26 minuta, Jose Ulises Arias kellu l-konlużjoni mid-distanza tintemm barra.
Fit-tieni taqsima, il-partita kompliet b’ritmu kajman ikkaratterizzata minn ħafna logħob f’nofs il-ground.
Dan sas-60 minata meta Floriana kellhom ferħa bla temma hekk kif Jan Busutill, wieħed mill-aqwa players ta’ Floriana, tefa’ l-ballun fir-rokna tax-xibka iżda r-referee Ċek, Pavel Oral, kien diġá saffar għall-foul favur il-Greens bil-logħob kien wieqaf.
L-Armeni wieġbu fil-81 minuta meta wara li rċieva minn free-kick ta’ Constantin Sandu li kien ilu biss minuta fil-ground, Sergiu Piatica kellu d-daqqa ta’ ras tiegħu mill-viċin tintemm fuq is-saqaf tax-xibka.
Lejn it-tmiem, it-team immexxi mill-coach Gianluca Atzori kompla jippressa iżda l-players ta’ Petrocub dehru kalmi, tant, li bdew jimmansaw kull tentattiv tal-Maltin li fil-veritá kien jimmeritahom li joħorġu rebbieħa.
FLORIANA: 33-Georgi Kitanov, 2-Adam Magri Overend, 3-Christian Rutjens, 4-Oualid El Hasni, 8-Kemar Reid (11-James Scicluna 67), 9-Andrei Ciolacu (7-Mattia Veselji 67), 10-Jose Ulises Arias, 20-Matias Nicolas Garcia (21-Carlo Zammit Lonardelli 67), 28-Emiliano Callegari, 30-Jan Busuttil (18-Neil Cassar 88), 77-Alejandro Garzia (25-Lorenzo Trillo 58) – Coach: Gianluca Atzori
PETROCUB: 29-Cristian Avram, 4-Victor, Mudrac, 8-Iaser Turcan (94-Cornel Cotogoi 70), 9-Vladmimir Ambros, 11-Sergiu Piatica, 13-Artem Fedorov (10-Alexandru Bejan 46), 17-Victor Bogaciuc, 73-Ioan-Calin Revenco (93-Constantin Sandu 80), 90-Ion Jarden, 97-Marius Iosipol, 96-Maxim Cojocaru (23-Mihai Lupan 83) – Coach: Ivan Tabanov
REFEREE: Pavel Orel (Rep. Ċeka)
ASS. REFEREES: Petr Caletka, Tomas Mokrusch (Rep Ċeka)
RABA’ UFF: Josef Krejsa (Rep Ċeka)
SKORERS: Ħadd
AMMONITI: A. Garzia, C. Rutjens, O. El Hasni (F), I. Jardan, M. Cojocaru, A. Bejan (P)
