Velez Mostar …………0
Hamrun Spartans …..1
Hamrun Spartans għamlu pass kbir biex ikomplu javvanzaw fil-UEFA Conference League meta fl-ewwel leg tat-tieni round ta’ kwalifikazzjoni, barra minn darhom għelbu lil Velez Mostar tal-Bosnja bl-iskor ta’ 1-0, b’wirja dixxiplinata u fuq kollox eċċezzjonali.
Fl-ewwel parti tal-ewwel taqsima, Hamrun kienu territorjalment aħjar fejn bdew jiddettaw il-logħob iżda bdew jaslu biss sa tliet kwarti ta’ ground bil-Bosnjaċi joperaw b’kontrattakki veloċi bil-konsegwenza li d-difiża Maltija bdiet tinqabad bosta drabi.
Peró hekk kif fetħu l-iskor proprju fl-ewwel attakk perikoluż tagħhom, l-andament tal-logħba nbidel meta Velez żiedu r-ritmu iżda l-Ispartans għarfu jikkontrollaw il-furja tagħhom.
Fit-tieni taqsima, l-avversarji ppruvaw jagħmlu reazzjoni u ħarġu fuq l-offensiva iżda d-difiża Ħamruniża ‘fgat’ kull tentattiv tagħhom u aktar ma beda jgħaddi l-ħin bdiet tidher il-frustrazzjoni fost il-Bosnjaċi.
L-ewwel attakk denju wasal fir-raba’ minuta b’xutt fil-baxx ta’ Dodo li l-goalkeeper Slavisa Bogdanovic salva bi tbatija. Il-Bosnjaċi rreċiprokaw b’xutt ta’ Dino Hasanovic minn barra l-kaxxa li kien wieħed ċentrali.
Fit-tmien minuta, id-difiża Ħamruniż nqabdet fuq sieq waħda iżda x-xutt angolat ta’ Nermin Haskic għadda ftit barra. Fis-17-il minuta, l-istess player mill-istess pożizzjoni reġa’ falla l-mira bi ftit, f’kontrattakk korali.
Fis-26 minuta, il-Ħamruniżi ħelsuha ħafif meta minn cross fuq ix-xellug, il-clearance bir-ras ta’ Steve Borg kienet waħda erratika bil-ballun jasal għand Hasanovic li mill-viċin ra lil Henry Bonello jilqa’ t-tentattiv tiegħu.
Madankollu fit-30 minuta, huma fetħu l-iskor meta mill-cross ta’ Dodo, id-daqqa ta’ ras ta’ Elvis Mashike ġiet salvata parzjalment mill-goalkeeper, Slavisa Bogdanovic, megħjun mill-wieqfa iżda l-ballun waqa’ għand MATTHEW GUILLAUMIER li ddepożita l-ballun fix-xibka.
Seba’ minuti mill-ftuħ tat-tieni taqsima, Hamrun resqu viċin li jirduppjaw iżda l-kanunata ta’ Ryan Camenzuli minn tarf il-kaxxa ġiet imblukkata minn Frane Ikic hekk kif il-ballun deher destinat għal ġox-xibka.
B’mod gradwali, il-players ta’ Velez bdew jirbħu l-inizjattiva iżda bl-ebda mod ma setgħu jinfdu d-difiża Hamruniża … u jekk għamlu dan f’każijiet iżolati … sabu lil Henry Bonello attent bejn il-lasti.
Fil-75 minuta, Moussa Balla Sowe għadda ballun delizjuż lejn Igor Nedeljkovic li iżda kien pass qabel il-ballun f’tarf il-kaxxa ż-żgħira. Fil-ħin miżjud l-istess Nedeljkovic falla bi ftit it-tieni goal Ħamruniż b’xutt bid-dawra.
Peró l-aħħar save tal-partita kien dak ta’ Henry Bonello li prattikament salva goal ċert mix-xut ta’ Haskic
Velez M.: 93-Slavisa Bogdanovic, 3-Antonio Pavic (23- Djordje Pantelic 58), 6-Samir Zeljkovic, 8-Mehmed Cosic, 10-Nemanja Andusic (80-Arman Dzankovic 80), 17-Nermin Haskic, 24-Dino Hasanovic (18-Jovan Blagojevic 58), 25-Frane Ikic, 26-Emir Halilovic, 56-Dzenan Zajmovic (28-Edo Vehabovic 58), 88-Samir Radovac (7-Omar Prses 75) – Coach: Amar Osim
Hamrun S.: 1-Henry Bonello, 4-Steve Borg, 6-Matthew Guillaumier, 9-Elvis Mashike (35-Igor Nedeljkovic 73), 10-Dodo (3-Bruno Ederson Domingos 85), 12-Roko Prsa, 27-Ognjen Bjelicic, 28-Juan Carlos Corbolan, 63-Jonny (22-Moussa Balla Sowe 63), 91-Emerson Marcelina, 94-Ryan Camenuli – Coach: Branko Nisevic
Referee: Andrew Davey (Irlanda ta’ Fuq)
Assistenti: Georgios Argyropoulos, Stephen Bell (Irlanda ta’ Fuq)
Raba’ Uffiċjal: Christopher Morrison (Irlanda ta’ Fuq)
Skorer: M. Guillaumier 30 (HS)
Ammoniti: N. Haskic, M. Cosic (VM)
