Alashkert ……….1
Hamrun S. ……..0
Hamrun Spartans irritornaw fil-kompetizzjonijiet Ewropej wara nuqqas ta’ 30 sena hekk kif fl-ewwel leg tal-ewwel round ta’ kwalifikazzjoni tal-UEFA Conference League huma sfaw megħluba bl-iskor ta’ 1-0 minn Alashkert … liema riżultat jista’ jiġi rkuprat meta l-ġimgħa d-dieħla t-tieni leg se jintlagħab fis-Centenary Stadium.
Dan il-konfront kellu żewġ uċuh hekk kif Alashkert kienu l-aħjar team fl-ewwel taqsima iżda wara l-mistrieħ, l-Ispartans urew maturitá kbira fil-logħob tagħhom biex għal ħinijiet twal xeħtu lill-avversarji jiddefendu.
Sa mis-suffara inizjali, Hamrun Spartans ħarġu fuq l-offensiva biex isibu goal kmieni iżda mal-ħin l-avversarji bdew jissetiljaw u saħansitra bdew jirbħu l-inizjattiva.
Madankollu l-aħjar żewġ ċansijiet wara kwarta logħob waslu min-naħa tal-Maltin hekk kif it-tentattiv ta’ Dodo u Jonny kienu mblukkati fil-ħin. L-Armeni għamlu reazzjoni permezz ta’ xutt perikoluż minn Benik Hovhannisyan li ġie mdawwar f’corner.
Iżda fl-24 minuta, Alashkert fetħu l-iskor meta Bladimir Diaz daħal fil-kaxxa u filwaqt li ma setax jippenetra huwa għadda l-ballun lura lil Artak Yedigaryan li kien ġej bil-ġirja u minn tarf il-kaxxa għeleb lill-goalkeeper Henry Bonello b’xutt fil-baxx.
Fl-34 minuta, kien Emerson Marcelina providenzjali għall-Ispartans meta antiċipa fil-ħin lil Diaz li deher li seta’ jikkonkludi.
Fit-42 minuta, f’attakk iżolat ta’ Hamrun, Matthew Guillaumier niżżel b’sidru lejn Elvis Mashike iżda minn tarf il-kaxxa falla kompletament il-mira.
It-tieni taqsima bdiet minn daqqa ta’ ras ta’ Mashike li għaddiet ftit barra. Ir-risposta tal-Armeni waslet għaxar minuti wara meta minn pożizzjoni ideali, Diaz xeħet għoli.
Fid-59 minuta, l-Ispartans resqu viċin meta mill-freekick ta’ Dodo, Mashike kompla lejn Jonny ġie antiċipat mill-goalkeeper Ognjen Cancarevic.
It-team immexxi mill-coach, Branko Nisevic, beda juri l-aħjar logħob iżda meta bdew jaslu sa tliet kwarti ta’ ground huma bdew isibu lid-difiża avversarja attenta bil-konsegwenza li ma setgħux jippenetraw.
Fid-79 minuta, Marcelina falla ċans tajjeb meta laqat ħażin bir-ras minn azzjoni ta’ corner. Iżda żewġ minuti mit-tmiem kien proprju l-istess Marcelina li salva lit-team tiegħu meta kien puntwali f’tarf il-kaxxa biex tajjar il-ballun minn saqajn Ismael Fofana li kien jiġi waħdu quddiem il-goalkeeper Ħamruniż.
Fil-91 mintua xutt mid-distanza tal-ex player ta’ Floriana, Rumyan Hovsepyan, spiċċa għoli. Il-partita spiċċat bi free-kick ta’ Matteo Fedele li kien għoddu ħasad lil Cancarevic bil-ballun jispiċċa parzjalment f’idejh iżda mbagħad jintemm f’corner.
Alashkert: 22-Ognjen Cancarevic, 2-Tiago Cameta, 3-Taron Voskanyan, 5-Didier Boris Kadio, 17-Artak Yedigaryan (11-Sargis Shahinyan 90), 20-Thiago Galvao (55-Sargis Metoyan 46) 21-Artak Grigoryan, 27-David Khurtsidze (9-Aleksandre Karapetyan 80), 70-Benik Hovhannisyan (77-Rumyan Hovsepyan 46), 88-James, 95-Bladimir Diaz (15-Ismael Fofana 60) – Coach: Karen Barseghyan
Hamrun S.: 1-Henry Bonello, 3-Bruno Emerson Domingos (35-Igor Nedeljkovic 62) , 4-Steve Borg, 6-Matthew Guillaumier, 9-Elvis Mashike, 10-Dodo (20-Matteo Fedele 90), 27-Ognjen Bjelicic, 28-Juan Carlos Corbolan (30-Karl Micallef 76), 63-Jonny (12-Roko Prsa 62), 91-Emerson Marcelina, 94-Ryan Camenzuli – Coach: Branko Nisevic
Referees: Vassilis Fotias (Greċja)
Assistenti: Andreas Meintanas, Konstantinos Psarris (Greċja)
Raba’ Uffiċjal: Agelos Evangelou (Greċja)
Skorer: Y. Yedigaryan 24 (A);
Ammoniti: J. Corbolan, M. Guillaumier, E. Marcelina, I. Nedeljkovic (HS); B. Diaz, I. Fofana (A)
