UEFA Nations League tan-Nisa: Rebħa prestiġjuża minn Malta

Georgia …….2

Malta ……….3

F’wirja mill-aqwa, it-team nazzjonali tan-Nisa għe­leb lil dak ta’ Georgia bl-iskor ta’ 3-2 valida minn Grupp C2 tal-UEFA Nations League biex filwaqt li kiseb it-tliet punti issa tela’ fit-tieni post tal-klassifika wara Ċipru. 

Kienu l-Maltin li ħolqu l-ewwel periklu, fil-21 minuta, meta Haley Bugeja għaddiet tajjeb lejn Maria Farrugia, iżda pront kienet il-goalkepeer ta’ Georgia, Tatia Gabunia, li ħarġet barra minn postha u interċettat kull periklu.

Fis-26 minuta, il-Maltin fetħu l-iskor meta Haley Bugeja indirizzat cross li sab lil MARIA FARRUGIA li b’daqqa ta’ ras preċiża mill-viċin tefgħet ġewwa.

Fit-30 minuta, it-tfjaliet tagħna rduppjaw meta HALEY BUGEJA avvanzat fil-kaxxa u minn pożizzjoni angolata immirat lejn ir-rokna tax-xibka.

Il-Maltin komplew jiddettaw il-logħob u żewġ minuti wara,  Emma Lipman kellha xutt minn pożizzjoni ideali salvat tajjeb mill-goalkeeper, Tatia Gabunia.

Madankollu, eżatt mat- tokki tal-45 minuta, il-Maltin skorjaw it-tielet goal meta  f’azzjoni ta’ kontrattakk veloċi, MARIA FARRUGIA, daħlet fil-kaxxa u b’xutt qaw­wi rreġistrat doppjetta pe­r­sonali.

Fil-55 minuta, ersaqna viċin ir-raba’ goal meta f’az­zjoni bejn Haley Bugeja u Rachel Cuschieri spiċċat b’din tal-aħħar tiġi mċaħħda mill-wieqfa.

Iżda fis-60 minuta, l-avversarji naqqsu l-marġni tal-iskor meta   Tatiana Matveeva approfittat minn żball ta’ Emma Lipman fid-difiża, għaddiet tajjeb lejn TEONA BAKRADZE, li kkontrollat tajjeb il-ballun qabel ma għelbet lill-goalkeeper,     Janice Xuereb.

Fis-70 minuta, il-Maltin fallew okkażjoni ta’ skor meta xutt ta’ Bugeja ġie salvat parzjalment minn Gabunia u mir-rebound Cuschieri xeħ­tet barra.

Iżda fit-80 minuta, l-istess Cuschieri reġgħet kienet sfortunata meta ġiet imċaħ­ħda mill-mimduda.

Peró, fl-94 minuta, Georgia naqqsu d-distakk meta ngħataw penalty wara li Ni­cole Sciberras waqqgħet lil Bakradze.

Mill-11-il metru,  il-goalkeeper Maltija sa­l­vat ix-xutt ta’ MATIA DANELIA iżda r-referee ordnat li l-penalty jerġa jingħata u mat-tieni tentattiv l-attakkant Gorġjana ma żbaljatx.

GEORGIA: 12-Tatia Gabunia, 7-Tatiana Matveeva (17-Lizi Mtskerashvili 88), 10-Teona Bakradze, 16-Salome Gas­viani, 6-Matia Danelia, 3-Nino Pasikashvili, 4-Nino Chkhartishvili (11-Sopiko Narsia 69), 2-Gvan­tsa Kadagishvili, 21-Mariam Kalandadze, 19-Nino Bukhnikidze (9-Maiko Bebia 46), 15-Tinatin Ambalia (8-Irina Khaburdzania 54)   – Coach: Iris Avraham-Antman

MALTA: 1-Janice Xuereb, 13-Maya Lucia, 4-Emma Lipman, 5-Oceane Grange, 18-Emma Xuereb (15-Fiona Buttigieg 93), 8-Rachel Cuschieri, 20-Nicole Sciberras, 14-Shona Zammit (17-Jana Barbara 88), 10-Maria Farrugia, 11-Kailey Willis (7-Lexine Farrugia 88), 21-Haley Bugeja (19-Yulya Carella 93)   – Coach: Manuela Tesse

REFEREE: Elvira Nurmustafina (Kazakhstan)

ASS. REFEREES: Nargis Magau, Dinara Idrisova (Kazakhstan)

RABA’ UFF: Tatyana Sorokopudova (Kazakhstan)

SKORERS: M. Farrugia 27, 45, H. Bugeja 30 (M), T. Bakradze 60, M. Danelia pen. 95 (G)

AMMONITI: T. Ambalia 38 (G), E. Lipman, K. Willis (M)