MALTA …………. 1
RUMANIJA ……. 4
Malta sfat megħluba 4-1 mir-Rumanija fil-logħba tal-ftuħ ta’ Grupp B2 tal- Kwalifiki tal-Kampjonat Ewropew tan-Nisa U17 tal- UEFA.
Ir-Rumen kienu b’saħħithom wisq għall-Maltin, li f’bosta okkażjonijiet ġew imgiegħla jirtiraw lura biex jilqgħu l-pressjoni tal-avversarji.
Malta bdiet il-partita bil-biċċa l-kbira tal-pussess, b’ħafna passes flimkien, partikolarment fuq il-lemin. Iżda minkejja dan, il-players tagħna sabuha ferm diffiċli biex isibu l-ispazji.
L-ewwel okkażjoni denja ta’ nota waslet fis-sitt minuta, meta f’kontrattakk veloċi, ir-Rumeni fetħu l-iskor minn BOGLARKA FULOP, li daret mal-goalkeeper, Julia Maria Zarb, u tefgħet fix-xibka
Iżda, fit-13-il minuta, il- Maltin rnexxielhom jagħmlu l-iskor indaqs hekk kif KAY AXIAK sabet spazju wara d-difiża Rumena, u wara ġirja eċċellenti, tefgħet il-ballun fix-xibka.
Madankollu, l-iskor dam biss ftit sekondi, hekk kif ir-Rumanija reġgħu marru fil-vantaġġ permezz ta’ auto-goal, wara li l-ballun sfortunatament ħabat ma’ Ilona Abela qabel spiċċa ix-xibka.
Ir-Rumeni bdew isibu aktar spazju wara l-midfielders Maltin, u fit-18-il minuta, resqu viċin li jiskorjaw it-tielet goal wara li xutt ta’ Elena Corina Colibaba minn barra l-kaxxa għadda eżatt fuq il-lasti.
Fil-35 minuta, ir-Rumanija resqu ferm viċin li jkabbru l-iskor meta l-ballun waqa’ għand Andreea Candea fil-kaxxa, iżda din kellha t-tentattiv tagħha salvat b’mod brillanti minn Zarb li dawret f’corner.
Minkejja dan, huma skorjaw mill-corner sussegwenti, li meta ngħata minn VIOLETA BOGOS ħadd ma mess il-ballun biex spiċċa fix-xibka.
Wara l-mistrieħ, ir-Rumanija baqgħu jikkontrollaw il-logħob, u fit-53 minuta, Maria Isabel Olah ittantat xortiha minn tarf il-kaxxa, iżda t-tentattiv tagħha għadda għoli.
Fl-aħħar ħinjiet, b’mod gradwali l-Maltin reġgħu kibru fl-istatura u bdew jilagħbu b’mod intelliġenti kif ukoll kienu perikolużi fil-kontrattakki.
Madankollu, it-theddida tar-Rumanija baqgħet waħda kostanti, tant, li Lorelai Zamfir ġiet imċaħħda mill-wieqfa.
U fit-tielet minuta tal-ħin miżjud, SARA BORTEA ssiġillat ir-rebħa permezz ta’ daqqa ta’ ras minn azzjoni ta’ corner.
Fil-partita l-oħra, l-Ukrajna għelbu lil Moldova 5-0.
Il-logħba li jmiss għal Malta hija kontra l-Ukrajna nhar is-Sibt li ġej, 16 ta’ Novembru, fis-Centenary Stadium, li tibda fil-11.00 am.
Malta: 12-Julia Maria Zarb, 3-Lara May Azzopardi (C), 5-Krista Sacco (16-Jade Galea 77), 6-Amy Portelli, 8-Shaiel Falzon (7-Martina Vassallo 77), 14-Nina-Lee Naudi (13-Maia Gauci 61), 15-Alanah Ghio, 17-Tea Kimamo (11-Olivia Mae Taylor 61), 18-Kay Axiak, 19-Ilona Abela, 21-Alexis Mallia (20- Gloria Cassar 66) – Coach: Clint Tabone.
Rumanija: 1-Elena Izabela Coman (GK), 3-Georgiana Nicolae (C), 5-Sara Bortea, 6-Violeta Bogos, 7-Elenia Corina Colibaba (14-Carla Ștefania Rebrisorean 46) 8-Anastasia Lionte (4-Irina Apostol 70), 10 Andreea Candea (17-Lorelai Zamfir 79), 11-Maria Isabel Olah (9-Lorena Mihailesc 70), 13-Boglarka Fulop, 15-Sophie Marie Cojanu (18-Anabele-Natsi Nombot 46), 16-Jeaqueline Craiovan – Coach: Iosif Damaschin.
Referee: Stacey Pearson (Ingilterra).
