Ir-raġel li sab ruħu f’diffikultajiet fil-bajja jgħum tad-Dwejra ġie ċċertifikat mejjet. Ir-raġel ġie dentifikat bħala Ukren ta’ 29 sena.
Il-Pulizija fi stqarrija qalu li kienu ntalbu l-għajnuna għall-ħabta tat-1.30pm.
Il-Pulizija marret mill-ewwel fuq il-post fejn xi persuni li kienu fl-istess żona indikaw fejn l-aħħar li ntlemaħ ir-raġel fil-baħar. Minnufih intalbet l-assistenza tal-membri tal-Protezzjoni Ċivili u tal-Forzi Armati ta’ Malta li bdew bit-tfittxijiet.
Wara madwar tliet sigħat intlemaħ katavru fil-baħar fejn ittella’ u ddaħħal l-art fil-Port tal-Imġarr. Hemmhekk ġie kkonfermat li kien l-istess raġel.
Il-Maġistrat Dr Simone Grech LL.D ġiet infurmata bil-każ u ħatret inkjesta, filwaqt li l-Pulizija għaddejja bl-investigazzjonijiet fuq il-każ.
Aktar kmieni: L-AFM qed jipprovaw itellgħu persuna mill-baħar fid-Dwejra Għawdex
Kien għall-ħabta tas-1.30pm meta l-pulziija ġew informati li fil-baħar tad-Dwejra f’Għawdex kien hemm persuna li kienet tidher li tinsab f’diffikultajiet.
Minnufih marru l-Forzi Armati ta’ Malta permezz ta’ partol boat u anke uffiċjali tal-Pulizija.
S’issa jidher li din il-persuna għadha fil-baħar. Persuni fuq il-post li tkellmu ma’ dan is-sit qalulna li l-operazzjoni hija waħda diffiċli ħafna minħabba l-kundizzjoni tal-baħar. Sorsi qrib l-uffiċjali tal-Pulizija qalu lil dan is-sit li l-Forzi Armati qegħdin jipprovaw jagħmlu dak kollu posibbli biex itellgħu lil persuna lura f’art, “iżda jekk mhux se jkun hemm ħelikopter allura se jkun ferm diffiċli.”
Aktar informazzjoni kif taslilna…