It-team nazzjonali Malti ta’ Taħt il-21 sena, immexxi mill-coach Ivan Woods, illum f’Algeciras, fil-5.00 pm, jilgħab l-aħħar logħba tiegħu minn Grupp B ta’ kwalifikazzjoni għall-Kampjonat Ewropew 2025 meta jaffronta lil Spanja.
Sfortunatament, il-Maltin tilfu l-partiti kollha li lagħbu bi statistika xejn inkoraġġanti hekk kif skorjajna erba’ goals biss u sofrejna 29.
Madankollu, fl-aħħar ħarġa, il-players tagħna taw wirja mill-aqwa f’Nandor Hidegkuti Stadium, f’Budapest, meta sfajna megħluba mill-Ungerija bl-iskor ta’ 2-1.
Punt ieħor pożittiv huwa li l-Maltin skorjaw fil-partiti li lagħbu barra minn darna, bl-attakkant Andrea Zammit kompla jispikka meta skorja l-uniku goal minn penalty biex kompla kabbar ir-rekord tiegħu tal-aqwa skorer ta’ kull żmien ta’ din il-kategorija.
Players bħal Mattia Veselji, Isaiah Chukunyere u Matthew Debattista, spikkaw ukoll fil-logħba kontra l-Ungerija u dawn mistennija jerġgħu jingħataw il-fiduċja minn Woods.
Mingħajr l-ebda dubju, il-partita tal-lum hija l-aktar waħda diffiċli għall-Maltin f’din l-edizzjoni minħabba li l-Ispanjoli huma meqjusa bħala ġganti.
It-team huwa mmexxi mill-coach, Santi Denia, li għandu 50 sena u li fi żmienu kien jilgħab bħala difensur ċentrali ma’ Albacete u Atletico Madrid. Fl-istess waqt, huwa lagħab fil-kategoriji kollha tat-team nazzjonali Spanjol fejn anke deher darbtejn mat-team tal-kbar.
Iż-żewġ timijiet diġá ltaqgħu, fit-8 ta’ Settembru, 2023, f’Tony Bezzina Stadium, bl-Ispanjoli joħorġu rebbieħa bl-iskor kbir ta’ 6-0.
Klassifika: 25 – Spanja; 19 – Belġju; 16 – Skozja; 13 – Ungerija; 6 – Kazakhstan; 0 – Malta
