Il-coach tat-team nazzjonali ta’ Taħt il-21 sena, Ivan Woods, esprima l-aspett pożittiv tiegħu f’dak li għandu x’jaqsam mal-ispirtu u l-preparazzjoni tal-players tiegħu għall-konfront kontra l-Kazakhstan li se jintlagħab illum, f’Tony Bezzina Stadium, fis-6.00 pm, validu minn Grupp B, tar-round ta’ kwalifikazzjoni tal-Kampjonat Ewropew.
Madankollu huwa naqqas kull entużjażmu żejjed u insista li tilgħab f’dan il-livell internazzjonali trid tagħti l-aħjar tiegħek f’kull mument u f’kull sitwazzjoni matul u m’hemm l-ebda garanzija ta’ punti.
F’konferenza tal-aħbarijiet, Woods tkellem dwar din il-partita, fejn skond hu, hija l-aktar waħda diffiċli s’issa ta’ dan il-grupp.
“Din hija l-aktar partita iebsa tagħna s’issa f’dan il-grupp ta’ kwalifikazzjoni. Nafu li kontra l-Kazakstan l-aspettattivi jistgħu jkunu għoljin. Ninsab kuntent, bl-attitudni u l-impenn tal-players li wrew fil-logħbiet preċedenti, iżda rridu nibqgħu konċentrati matul il-logħba kollha.”
“Ilkoll innutajna titjib sinifikanti li rreġistra dan it-team mill-ewwel konfront u t-telfa (ta’ 7-0) kontra Spanja f’Settembru sal-prestazzjoni inkoraġġanti tax-xahar li għadda barra minn darna kontra l-Iskozja (1-2), għalkemm ir-riżultat finali kien wieħed sfortunat għalina”.
Il-coach Woods enfasizza li: “Ninsab konxju li l-Kazakhstan huwa team iebes. S’issa segwejna l-mixja tagħhom f’dan il-grupp, fejn tilfu kontra l-Belġju, kif ukoll kontra Spanja, iżda xorta ħolqu ċansijiet ta’ skor u pproduċew football kompetittiv.
“Se nkunu qed niffaċċjaw team li ġej minn pajjiż ta’ 20 miljun persuna u għalhekk irridu nżommu saqajna mal-art, għalkemm nemmnu fil-potenzjal, il-fiduċja u l-preparazzjoni tal-players tagħna.”
B’referenza għat-tħabbira finali tal-iskwadra ta’ 23 player, Woods faħħar l-impenn tal-istess players, inklużi xi uċuħ ġodda fil-grupp li żgur se jimmassimizzaw din l-opportunità, magħżula wkoll fost attributi oħra, wara li kisbu ħin ta’ logħob sinifikanti mat-timijiet rispettivi tagħhom.
“Kollox huwa mertu tal-players li fiżikament jinsabu f’forma aħjar, peress li ngħataw aktar ħinijiet mit-timiijet rispettivi tagħhom.”
Huwa temm jgħid li, “Se nitilfu ftit players li kienu sfurzati jirtiraw minħabba bosta injuries iżda se jirkupraw għall-partita sussegwenti … dik ta’ ħbiberija li se nilagħbu kontra l-Litwanja, nhar it-Tnejn li ġej.”
