Ġermanja …..1
Portugall ……2
Il-Portugall huma l-ewwel finalisti tal-UEFA Nations League meta fis- semi-finali huma dawru telfa f’rebħa biex għelbu lill-Ġermanja bl-iskor ta’ 2-1, biex nhar is-Sibt jilagħbu fil-finali kontra r-rebbieħa bejn Spanja u Franza li se jilagħbu llum.
Kienu l-Portugiżi li ħarġu tajjeb u fis-sitt minuta, Cristiano Ronaldo seta’ għamel aħjar meta ra t-tentattiv tiegħu mill-viċin jiġi salvat mill-goalkeeper, Marc-André ter Stegen.
Fid-19-il minuta, il-Ġermaniżi appellaw għal penalty meta Aleksandar Pavlovic deher jitwaqqa’ fil-kaxxa minn Gonzalo Inacio … iżda l-kuntatt kien wieħed minimu għall-aħħar.
Fit-30 minuta, il-goalkeeper, Diogo Costa, wettaqa save kbir fuq Leon Goretzka biex evita milli l-Ġermaniżi jiftħu l-iskor.
Mal-ftuħ tat-tieni taqsima Ronaldo falla ċans tad-deheb meta minn taħt il-lasti ma laqatx il-ballun.
U ta’ dan in-nuqqas, il-Portugiżi pattew qares hekk kif fit-48 minuta, Florian Wirtz fetaħ l-iskor għall-Ġermanja permezz ta’ daqqa ta’ ras mill-cross ta’ Joshua Kimmich li kien qed jilgħab il-100 partita bil-flokk nazzjonali Ġermaniż.
Peró, fit-63 minuta, il- Portugall kisbu d-draw minn xutt imdawwar ta’ Francisco Conceicao minn 35 metru bogħod.
U ħames minuti wara, Cristiano Ronaldo xeħet lit-team tiegħu fil-vantaġġ wara li għeleb in-nasba tal-offside biex skorja l-137 goal personali għal pajjiżu.
Il-Ġermaniżi ppruvaw jagħmlu reazzjoni iżda ma setgħu isibu t-triq lejn il-lasti avversarji.