L-iskwadra tal-Bulgarija kienet involtua f’inċident serju tat-traffiku ftit wara li waslet Georgia fejn għada kienet mistennija tilgħab partita bejn iż-żewġ pajjiżi valida mill-UEFA Nations League.
Ix-xarabank li kienet qed iġġorr lill-players tilfet il-kontroll fil-belt kapitali, Tbilisi, bil-konsegwenza li l-midfielder, Todor Nedelev, kellu jittieħed l-isptar b’urġenza minħabba l-ġrieħi li sofra.
L-FA Bulgara fi stqarrija kkonfermat li l-players tat-team nazzjonali kien involut f’inċident tat-traffiku.
Filwaqt li l-players sofrew minn xokk qawwi, Nedelev, inżamm l-isptar.
Huwa lagħab 44 partita għal pajjiżu fejn proprju kien hu li skorja għall-Bulgarija fid-draw ta’ 1-1 kontra Ġibiltá, nhar il-Ħamis li għadda.
Dan il-player ta’ 29 sena jilgħab ma’ Botev Plovdiv.
Bħalissa l-Bulgarija tinsab fit-tielet post ta’ Grupp 3 ta’ din il-kompetizzjoni wara Georgia u l-Maċedonja.
