Valencia ċaħdu kategorikament ix-xnigħat li huma jridu jbiegħu lil Carlos Soler lil Barcelona, matul is-sajf li ġej.
Nhar it-Tnejn, rapport fi Spanja sostna li ż-żewġ clubs kienu laħqu ftehim għat-trasferiment tal-midfielder, bil-ġganti Katalani għandhom iħallsu €20m biex jiffirmawh fit-tieqa tat-trasferimenti li jmiss.
Madankollu, Valencia malajr ħarġu stqarrija fejn ċaħdu li kellhom xi taħditiet mar-rivali tagħhom ta’ La Liga dwar ftehim tas-sajf għall-internazzjonali ta’ Spanja.
Valencia poġġew ukoll il-messaġġ “Tigdbux!” fuq ritratt tal-midfielder fuq il-kont tagħhom ta’ Twitter.
Intant, is-sitt darbiet champions Spanjoli qalu li jinsabu fi “proċess ta’ negozjar miftuħ” ma’ Soler dwar estensjoni tal-kuntratt fil-Mestalla, bil-kuntratt eżistenti tiegħu se jkun qed jiskadi f’Ġunju tal-2023.
