Valletta FC laħqu ftehim biex jiffirmaw lill-eks goalkeeper ta’ Santa Lucia, Julani Archibald.
Il-Beltin kienu qed ifittxu goalkeeper fl-aħħar jum tat-trasferimenti wara li ddeċidew li jħallu lil Timothy Aquilina jingħaqad ma’ Swieqi United.
Valletta xeħtu ħarsithom fuq il-goalkeeper veteran Archibald li qabel li jirritorna fil-Malta Premier.
Il-goalkeeper ta’ St Kitts & Nevis huwa wiċċ familjari fil-futbol Malti wara li fis-sajf tal-2021 ingħaqad ma’ Santa Lucia qabel ma qatta’ perjodu qasir ma’ Birkirkara.
Il-goalkeeper qatta’ 12-il xahar fil-futbol Malti qabel ma fittex esperjenza ġdida hekk kif wara l-esperjenza tiegħu f’pajjiżna mar jilgħab il-Honduras fejn lagħab ma’ CD Victoria u Platense FC.
Ma’ Valletta FC, Archibald huwa mistenni li jipprovdi kompetizzjoni għall-goalkeeper Brażiljan Adilson Maringa.