Floriana ħasdu lil MFPA u rebħulhom 11-5 fis-seba’ ġurnata tal-Malta Veterans Premier League.
Il-Furjaniżi ħarġu motivati li jiksbu t-tliet punti minn din il-partita u mal-ewwel stabilixxew vantaġġ tajjeb fejn minkejja r-reazzjoni tal-Malta Football Players Association, xorta kisbu l-objettivi tagħhom.
Bojan Kaljevic, Diego Fernando Pereira u Firas Aboulezz skorjaw tliet gowls kull wieħed filwaqt li Ryan Darmanin skorja doppjetta personali.
MFPA skorjaw permezz ta’ Stanimir Miloskovic, Mark Zammit, Alexander Marinkovic, Alexander Ribic u Carlo Mamo.
Minkejja t-telfa, MFPA baqgħu jokkupaw l-ewwel post tal-klassifika għalkemm issa Floriana jinsabu biss punt warajhom.
Referee kien Paul Apap.
Gżira United Veterans resqu viċin it-timijiet ta’ fuq b’rebħa ta’ 6-5 kontra Luxol St Andrew’s.
Ma kinitx logħba faċli għall-Maroons bit-tim minn St Andrew’s li ta logħba kbira u kienu sfortunati li ħarġu bit-telf minn din il-partita.
Kurt Magro irritorna bil-kbir għal Gżira meta skorja tripletta filwaqt li Sebastian Nayar, Romeu Romao u Ian Zammit komplew żiedu l-iskor għat-tim tagħhom.
Emerson Amaira skorja doppjetta filwaqt li Gary Inguanez, Karl Sacco u Glenn Bonello wkoll niżżlu isimhom fost l-iskorers.
Referee kien Igor Kankaras.
Birkirkara St Helen’s irritornaw għar-rebħ wara li għelbu lil Hibernians 5-3.
Federico Marine u Christian Caruana skorjaw doppjetta kull wieħed b’Daniel Scerri li wkoll sab ix-xibka għal Birkirkara.
Hibs kellhom lil Dylan Mercieca jiskorja doppjetta bi Clayton Micallef Vassallo li skorja gowl ieħor.
Referee kien Igor Kankaras.
Rabat Veterans ixxalaw u għelbu lil Żurrieq Wolves 7-0.
Kif jindika l-iskor, Rabat Veterans iddominaw din il-partita mill-bidu sal-aħħar. Adam Smeir spikka għar-Rabtin meta kien awtur ta’ tripletta filwaqt li Andre Scicluna irreġistra doppjetta. Luke Portelli u Andy Mangion komplew mar-rebħa Rabtija.
Referee kien Paul Apap.
KLASSIFIKA – MALTA VETERANS PREMIER LEAGUE
MFPA 16, Floriana 15, Gżira United 13, Luxol St Andrew’s 12, Hibernians 10, Birkirkara St Helen’s 7, Rabat Veterans 6, Żurrieq Wolves 3.