Manchester United u Chelsea huma rrapportati li qed jagħmlu lill-attakkant internazzjonali Niġerjan ta’ Napoli, Victor Osimhen, bħala l-prioritá tagħhom fis-suq tat-trasferimenti tas-sajf li ġej wara l-wirjiet impressjonanti li rawh jiskorja 16-il goal u s’issa huwa l-aqwa skorer tas-Serie A.
Osimhen kompla l-forma mpekkabbli tiegħu b’doppjetta fir-rebħa ta’ Napoli ta’ 3-0 barra minn darhom kontra Spezia nhar il-Ħadd li għadda li rathom ikabbru l-vantaġġ tagħhom fil-quċċata tal-kampjonat Taljan għal 13-il punt.
Il-coach Olandiż tar-Red Devils, Erik ten Hag, jinsab ħerqan li jdaħħal attakkant ġdid fis-sajf li ġej hekk kif jipprova jkompli jibni fuq dik li kienet kampanja ta’ debutt brillanti fit-tmexxija tat-team.
Is-sid ta’ Chelsea, Todd Boehly, sostna li jrid jibni team mill-aqwa u għaldaqstant Osimhen huwa l-player adattat biex l-iskwadra tkun kompleta.
Min-naħa tagħhom, Napoli jemmnu li ż-żewġ clubs tal-Premier League huma lesti li jħallsu £107 miljun … is-somma tal-klawsola ta’ rilaxx tal-player ta’ 24 sena.
Chelsea diġá ħallsu din iċ-ċifra meta fl-aħħar mumenit tas-suq tat-trasferimenti ta’ Jannar, huwa akkwistaw lill-midfielder internazzjonali Arġentin, Enzo Fernandez, mingħand Benfica. U mhux se jieqfu hawn.
Bħalissa l-Blues qed jutilizzaw lil Kai Havertz bħala l-attakkant ewlieni liema pożizzjoni mhux qed jaqdi tajjeb minħabba li l-irwol tiegħu hija dik ta’ midfielder offensiv.
Aktar minn hekk, il-Pensioners qed jevalwaw ukoll is-sitwazzjoni tal-attakkant internazzjonali Portugiż, Rafael Leao, li jidher li mhux se jġedded il-kuntratt tiegħu ma’ Milan u għaldaqstant ma tkun l-ebda sorpriża li kieku ż-żewġ players jilbsu l-flokk ta’ Chelsea.
L-alternattiva ta’ Manchester United jekk it-trasferiment ta’ Osimhen ifalli hija l-attakkant internazzjonali Ingliż ta’ Tottenham Hotspur, Harry Kane, li fi tmiem il-ġimgħa li għadda sar l-aqwa skorer ta’ Tottenham ta’ kull żmien meta kiser ir-rekord ta’ Jimmy Greaves, b’267 goals.