L-eks attakkant tal-Italja u ta’ Roma, Vincenzo Montella, se jinħatar coach tat-team nazzjonali tat-Turkija, b’kuntratt ta’ tliet snin.
Huwa laħaq ftehim mal-Federazzjoni Torka u fis-sigħat li ġejjin mistenni jiffirma l-kuntratt wara li t-taħditiet ilhom għaddejjin minn nhar it-Tlieta li għadda.
Montella, li lagħab ma’ Empoli, Sampdoria, Genoa, Roma u Fulham, ħalla lill-club Tork, Adana Demirspor, f’Ġunju li għadda wara li rebaħ 38 mis-76 logħba tiegħu fit-tmexxija tat-team.
Huwa beda l-karriera maniġerjali tiegħu fis-settur taż-żgħażagħ ta’ Roma u fl-2011 ġie promoss biex ikun fir-responsabbiltá tal-ewwel team.
Imbagħad ħa t-tmexxija ta’ Catania, Sampdoria, Milan u Fiorentina darbtejn. Huwa ħadem ukoll ma’ Hakan Calhanoglu matul iż-żmien tiegħu fit-tmexxija tar-Rossoneri u se jerġa’ jingħaqad mal-midfielder ta’ Inter fit-team nazzjonali Tork.