Minn Cristian Muscat
Malta ………3
Moldova …..1
B’wirja ta’ karattru u b’mod konvinċenti, Malta kisbet l-ewwel rebħa tal-Visit Malta Women’s Trophy meta f’Tony Bezzina Stadium għelbet lill-Moldova bl-iskor ta’ 3-1.
Kienu l-Maltin li ħolqu l-ewwel periklu fit-12-il minuta meta xutt ta’ Haley Bugeja minn tarf il-kaxxa spiċċa barra. Fil-21 minuta reġgħet kienet l-istess attakkanta Maltija, li kellha xutt minn barra l-kaxxa li ġie salvat tajjeb mill-goalkeeper, Munteanu.
Minuta biss wara, Nicole Sciberras reġgħet sabet lil Munteanu attenta. Il-Maltin komplew fuq l-offensiva u fil-25 minuta Rachel Cuschieri kellha xutt fil-baxx salvat għal darb’oħra minn Munteanu.
Iżda b’azzjoni wara l-oħra finalment wasal il-goal għall- Maltin eżattament fil-31 minuta meta minn azzjoni ta’ corner u numru ta’ rebounds, id-difensura CHARLENE ZAMMIT xeħtet fix-xibka permezz ta’ daqqa ta’ ras preċiża.
Madankollu, fil-45 minuta proprju fl-unika azzjoni denja ta’ nota li ħolqu il-Moldova ġabu l-iskor indaqs meta wara kontrattakk veloċi, DANIELA MARDARI, mill-viċin tefgħet ġewwa.
Fil-ftuħ tat-tieni taqsima l-Maltin ħarġu ferm aggressivi u ta’ dan ġew ippremjati meta fis-47 minuta reġgħu marru fil-vantaġġ meta minn azzjoni ta’ corner mix-xellug, is-sostituta JADE FLASK kellha t-tentattiv tagħha minn daqqa ta’ ras jintemm fix-xibka.
Il-Maltin komplew jippressaw u fil-51 minuta, Haley Bugeja temmet azzjoni personali b’lob delizzjuz iżda ntemm ftit għoli. Fil-65 minuta, il-Moldova rebħu penalty meta Carolina Tabur twaqqgħet fil-kaxxa iżda mill-11-il metru Irina Topal rat it-tentattiv tagħha jintemm għoli.
Fil-71 minuta, f’botta u risposta, il-Maltin issiġillaw ir-rebħa meta xutt b’saħħtu ta’ Rachel Cuschieri ħabat ma’ difensura tal-Moldova biex mir-rebound kienet HALEY BUGEJA li b’xutt b’saħħtu ieħor għelbet lill- goalkeeper sostituta, Evghenia Dumic.
Fit-83 minuta, il-Maltin kienu għoddhom għajtu l-għajta tal-goal għar-raba’ darba meta Bugeja temmet azzjoni personali bi cross-shot li sab lill-attakkanta Brenda Borg li iżda kienet sfortutanta li ġiet imċaħħda mill-wieqfa.
MALTA: 23-Maya Cachia, 3-Ann-Marie Said, 8-Rachel Cuschieri, 9-Alishia Sultana (7-Ylenia Carabott 77), 11-Martina Borg (15-Jade Flask 46), 13-Maria Farrugia, 14-Shona Zammit (17-Brenda Borg 46), 16-Charlene Zammit (Dorianne Theuma 46), 19-Maia Melanie Debono (22-Jessica Lee Dimech 67), 20-Nicole Sciberras (4-Jade Schembri 82), 21-Haley Bugeja – Coach: Mark Gatt
MOLDOVA: 2-Natalia Munteanu (1-Evghenia Dumic 35), 4-Eugenia Railean, 6-Mihaela Burdeniuc (7-Carina Doiban 46), 9-Daniela Madari, 10-Carolina Tabur (5-Stela-Aleina Tez 71), 11-Claudia Chiper, 13-Violeta Mitul, 16-Alina Chirica (20-Veronica Cojuhari 65), 17-Nedejda Colesnicenco, 19-Anastasia Sivolobova, 21-Irina Topal – Coach: Eduard Blanuta
REFEREE: Olivia Tschon (Awstrija)
SKORERS: C. Zammit 32, J. Flask 47, H. Bugeja 73 (Mlt), D. Mardari 45 (Mdv)
