Iktar kmieni llum, Wildlife Rescue Team Malta ħabbru li dalgħodu nstabet l-ewwel bejta tal-fkieren għal din is-sena, fir-Ramla l-Ħamra, Għawdex. Din intlemħet minn Serena — waħda mill-voluntiera tal-istess għaqda.
Membri minn Nature Trust kif ukoll uffiċjali tal-ERA (Environment & Resources Authority) marru fuq il-post u kkonfermaw li hemm bejta.
Iż-żona ser tkun osservata l-ħin kollu għal dawn ix-xahrejn li ġejjin mill-voluntiera ta’ Naturee Trust Mallta b’kollaborazzjoni mal-ERA. Dan ser isir sakemm ifaqqsu l-fkieren iż-żgħar.
Huwa importanti ħafna li kull min jilmaħ fekruna fuq xi bajja, iċempel minnufih fuq 99999505 u li ħadd m’għandu juża flash jew imiss il-fekruna.
Kull min jixtieq li jsir voluntier, jista’ jibgħat e-mail fuq: [email protected].
Sadanittant, it-tim ta’ Wildlife Rescue Team Malta se jkun qed ikompli bir-rondi tiegħu fuq bajjiet oħra.
