Il-livelli ta’ eċċitament qed jiżdiedu għall-Kampjonati Ewropej tal-Waterpolo 2024 li se jibdew illum fil-Kroazja u għada fl-Olanda, bil-kompetizzjoni tal-irġiel issir f’Dubrovnik u Zagreb u tintemm fis-16 ta’ Jannar, u t-tournament tan-nisa se jkun kontestat f’Eindhoven minn għada l-Ġimgħa sat-13 ta’ Jannar.
Iż-żewġ tournaments se jinkludu 16-il team, maqsuma f’erba’ gruppi ta’ erba’ timijiet f’kull wieħed, li jkunu qed jissieltu biex jiġu nkurunati r-Rejiet u l-Irġejjen tal-Ewropa.
Biljett wieħed għal-Logħob Olimpiku ta’ Pariġi 2024 u tlieta għall-Kampjonati tad-Dinja 2024 fil-Qatar se jkunu wkoll għall-akkwist f’kull kompetizzjoni.
Il-Kampjonati Ewropej tal-Waterpolo 2024 kienu oriġinarjament skedati li jsiru f’Netanya, Iżrael, bejn is-7 u l-21 ta’ Ottubru, għalkemm xorta se jissejħu Kampjonati Ewropej 2024, iżda sfortunatament is-sitwazzjoni attwali fil-pajjiż fissret li l-avveniment kellu jitmexxa f’pajjiżi oħra.
Billi t-tournament tal-2022 ġie kontestat b’suċċess fi Split, il-Kroazja hija l-ewwel pajjiż li se jospita l-Kampjonati Ewropej tal- Waterpolo f’żewġ okkażjonijiet wara xulxin.
L-Olanda lanqas ma hija barranija li tospita l-kompetizzjoni, wara li fl-2012 għamlet spettaklu mill-aqwa f’Eindhoven.
Fit-tournament tal-irġiel, iċ-champions renjanti, il-Kroazja, qed jimmiraw li jerġgħu jgħollu t-trofew f’pajjiżhom, filwaqt li r-rebbieħa renjanti tat-titlu tan-nisa, Spanja, qed ifittxu li jagħmluhom tliet rebħiet konsekuttivi wara li ħadu d-deheb fl-2020 u fl-2022.
It-team Malti li lejn l-aħħar tal-ġimgħa l-oħra ħa sehem fit-Tournament Internazzjonali tal-Milied, jinsab fi grupp diffiċli meta miegħu għandu lill-Ġermanja, is-Serbja u Iżrael meta huma dawn tal-aħħar li jidher li hemm xi ċans li niksbu riżultat tajjeb. Malta se tibda l-impenji tagħha għada kontra l-Ġermanja.
IL-FORMAT – Din se tkun l-ewwel edizzjoni bit-timijiet magħżula f’żewġ diviżjonijiet, ibbażati fuq l-aħħar edizzjoni u l-kwalifikazzjoni. L-aqwa tmien timijiet se jiffurmaw l-Ewwel Diviżjoni u t-tmien timijiet l-oħra t-Tieni Diviżjoni. Iż-żewġ diviżjonijiet se jinqasmu f’żewġ gruppi ta’ erba’ timijiet.
L-aqwa żewġ timijiet minn kull grupp tal-Ewwel Diviżjoni se jgħaddu direttament għall-kwarti-finali, filwaqt li ż-żewġ timijiet l-oħra minn kull grupp jilagħbu kontra wieħed mill-aqwa żewġ timijiet minn kull grupp fit-Tieni Diviżjoni fir-round tal-play-off.
Imbagħad, mill-kwarti-finali ‘l quddiem, se tintuża s-sistema regolari ta’ knock-out.
Kif huma ffurmati l-Gruppi:
GRUPP A – Kroazja, Spanja, Franza, Montenegro.
GRUPP B – Georgia, Greċja, Ungerija, Italja.
GRUPP C – Ġermanja, Iżrael, Malta, Serbja.
GRUPP D – Olanda, Rumanija, Slovenja, Slovakkja.
Logħob għal-lum:
Grupp A – 5.00 pm: f’Dubrovnik – Montenegro v Franza
Grupp B – 5.00 pm: f’Zagreb – Georgia v Italja
Grupp B – 7.00 pm: f’Zagreb – Ungerija v Greċja
Grupp A – 7.00 pm: f’Dubrovnik – Spanja v Kroazja
