Minn Cristian Muscat
Lejlet li t-team nazzjonali tal-waterpolo jibda bl-impenji tiegħu fi Grupp C tal-fażi ta’ kwalifikazzjoni għall-Kampjonat Ewropew tal-waterpolo, ġiet indirizzata konferenza stampa fil-kwartieri ġenerali tal-ASA mill-coach nazzjonali Karl Izzo u l-president Joe Caruana Curran.
Is-Sur Izzo aċċenna li jinsab ferm ottimist li tabilħaqq nistgħu niksbu l-kwalifikazzjoni minn dan il-grupp. Huwa saħaq li żgur li l-Maltin se jkunu qed iħossu n-nuqqas tal-captain Stevie Camilleri li mhux se jkun disponibbli għall-Maltin minħabba li se jkun impenjat mal-club tiegħu, Muri Antichi Catania, filwaqt li Jerome Gabarretta u Nicholas Bugelli jinsabu mweġġgħin.
Huwa sostna li l-Maltin kellhom kamp ta’ taħriġ ferm intensiv ta’ ħamest ijiem ġewwa Recco li fih seta’ jsegwi aħjar lill-players tiegħu. Dan filwaqt li afferma li kulħadd huwa konxju mill-qawwa tar-Rumanija iżda jinsab pożittiv li kapaċi niksbu rebħiet kontra l-Irlanda u l-Litwanja.
Mistoqsi minn dan il-ġurnal jekk jaħsibx li din l-iskwadra hijiex iktar superjuri jew inferjuri għal dik li permezz tagħha ksibna l-kwalifikazzjoni għall-Kampjonat Ewropew għal tliet darbiet konsekuttivi, huwa ma xtaqx jikkummenta hekk kif tenna li l-paraguni huma odjużi iżda għandu fiduċja assoluta f’din l-iskwadra.
Madankollu huwa tenna li: “Ninsab verament kuntent bil-fatt li bosta players żgħażagħ Maltin qed jilagħbu barra minn xtutna ma’ diversi timijiet barranin. Dan jawgura tajjeb għall-futur tal-waterpolo lokali.”
Min-naħa tiegħu, il-president tal-ASA, Caruana Curran, qal li jittama li t-team nazzjonali tal-kbar jista’ jżomm ix-xejra pożittiva riċenti li jikkwalifika għall-fażi finali li tkompli timmarka l-ħidma sfieqa li saret mill-ASA fl-aħħar snin.
“L-għan tagħna huwa li nippruvaw nibnu fuq ir-riżultati pożittivi miksuba fl-aħħar snin fejn irnexxielna nipparteċipaw fil-finali tal-Kampjonat Ewropew għall-aħħar tliet edizzjonijiet infila,” qal Caruana Curran.
“Il-fatt li t-team nazzjonali tagħna kien parti mill-aqwa 16-il pajjiż tal-Ewropa juri li ksibna xi ħaġa importanti ħafna.
“Fis-snin li ġejjin, l-għan huwa li nippruvaw u nkomplu ntejbu l-pożizzjoni tagħna fir-rankings Ewropej u l-prestazzjonijiet miksuba mit-timijiet nazzjonali tal-juniors tagħna fit-tournaments Ewropej tas-sena l-oħra juru li tabilħaqq ninsabu fid-direzzjoni l-ġusta.
Dan filwaqt li appella għal aktar sponsors biex jagħtu s-sostenn tagħhom lit-team nazzjonali Malti hekk kif irrimarka li xejn inqas minn 50% waqqgħu l-isponsor tagħhom matul il-pandemija.
Huwa appella wkoll lill-pubbliku sportiv Malti biex jattendi bi ħġaru għal dawn it-tliet logħbiet fejn jista’ jinxtara block ticket għall-prezz ta’ €10 mis-sit elettroniku uffiċjali tal-ASA biex ikun jista’ jsegwi dawn il-konfronti.
L-iskwadra msejħa hija:
Nicholas Grixti (Sliema), Jake Muscat (Neptunes), Andreas Galea (San Ġiljan), Jamie Gambin (Sliema), Darren Zammit (San Ġiljan), Matthew Zammit (San Ġiljan), Ben Plumpton (San Ġiljan), Jordan Camilleri (Neptunes), Jeremy Abela (Neptunes), Nikolai Zammit (San Ġiljan), Zach Mizzi (Sliema), Dino Zammit (Sliema), Jake Tanti (San Ġiljan), Liam Galea (Sliema), Matthew Mifsud (Sliema)
Il-programm ta’ logħob huwa:
Il-Ġimgħa
Rumanija v Litwanja 5.00 pm
Malta v Irlanda 6.30 pm
Is-Sibt
Rumanija v Irlanda 5.00 pm
Malta v Litwanja 6.30 pm
Il-Ħadd
Irlanda v Litwanja 9.00 am
Malta v Rumanija 10.30 am
