Minn Cristian Muscat
Neptunes…………….19
Birzebbugia………….3
(6-0, 5-1, 3-1, 4-1)
F’dik li aktar dehret bħala sessjoni ta’ taħriġ għal Neptunes, huma għelbu lil Birzebbugia bl-iskor kbir ta’ 19-3. B’hekk huma komplew jikkonfermaw il-qawwa tagħhom, fejn kienu diġá aċċertaw mir-rebħa sa tmiem l-ewwel sessjoni meta kienu bnew vantaġġ ta’ sitt goals. Min-naħa l-oħra kien hemm mumenti li fihom Birzebbugia ippruvaw iwettqu xi tip ta’ reazzjoni, iżda kull meta ppruvaw jagħmlu dan sabu team kumpatt u mimli epserjenza ta’ Neptunes li annullaw għal kollox l-isforzi tagħhom.
Għalihom spikka l-captain Stevie Camilleri li skorja xejn inqas minn sitt goals.
Neptunes ħarġu ferm aggressivi fl-ewwel sessjoni u skorjaw sitta mingħajr risposta ta’ bl-iskorers ikunu Jake Muscat (3), Michael Spiteri Staines, Stevie Camilleri minn penalty u Sam Gialanze.
Huma komplew jiddominaw u rebħu t-tieni sessjoni bil-punteġġ ta’ 5-1, bl-awturi tal-goals ikunu Sam Gialanze u Michael Spiteri Staines, Mark Castillo minn back-hand stupend, Jeremy Abela ukoll minn back-hand u l-captain Stevie Camilleri. Miguel Curmi irnexxielu jsib ix-xibka għal Birzebbugia.
Ta’ nota huwa l-fatt li fil-bidu ta’ din is-sessjoni Keith Tanti falla penalty għal Birzebbugia hekk kif ra t-tentattiv tiegħu mill-ħames metri jistampa mal-mimduda.
Neptunes rebħu wkoll it-tielet sessjoni, din id-darba bil-punteġġ ta’ 3-1, bil-protagonisti jkunu Jeremy Abela u Stevie Camilleri (3). Christian Mifsud permezz ta’ xutt mill-isbaħ mid-distanza wieġeb għat-team min-nofsinhar ta’ Malta.
Rimarkabbli huwa l-fatt li tliet minuti mill-ftuħ ta’ din is-sessjoni, Stevie Camilleri falla penalty meta ra lill-goalkeeper ta’ riserva ta’ Birzebbugia, Matthew Sladden, isalva bi bravura.
Neptunes għamluhom erbgħa minn erbgħa meta rebħu wkoll l-aħħar sessjoni bl-iskor ta’ 4-1, bil-goals jaslu mis-solitu Stevie Camilleri, Jeremy Abela u Sam Gialanze (2). Simeon Bezzina skorja l-uniku goal għal Birzebbugia.
Neptunes: 1-Alan Borg Cole, 2-Jake Muscat (3), 3-Sam Gialanze (4), 4-Gabriel Pace, 5-Jake Cachia, 6-James Spiteri Staines, 7-Stevie Camilleri (6), 8-Jordan Camilleri, 9-Jeremy Abela (3), 10-Michael Spiteri Staines (2), 11-Alec Fenech, 12-Mark Castillo (1), 13-Marco Rossi Coach: Jovan Popovic
Birzebbugia: 1-Miguel Vassallo, 2-Julian Farrugia, 3-Neil Cassar, 4-Ben Grech, 5-Christian Mifsud (1), 6-Ryan Mock, 8-David Cutajar, 9-Simeon Bezzina (1), 10-Keith Tanti, 11-Giuseppe Mannino, 12-Miguel Curmi (1), 13-Matthew Sladden, 14-Gabriel Sammut, 15-Manuel Giarratana Coach: Pierre Borg
Referees: Fabio Brasiliano, Peter Balzan
