Illum Malta se tilgħab kontra s-Slovenja fis-semi-finali għall-postijiet mit-13 sas-16 fejn b’rebħa l-Maltin ikollhom iċ-ċans li jtemmu fit-13-il post.
Imbagħad l-avversarji tagħna ikunu s-Slovakkja jew Iżrael fejn ma’ dawn tal-aħħar konna nvoluti f’logħba drammatika li l-players tagħna rebħuha 13-11 wara li f’ħin minnu kienu tliet goals minn taħt.
Is-Slovenja tilfu t-tliet logħbiet tal-grupp tagħhom kontra r-Rumanija 13-5, kontra l-Olanda 23-7 u kontra s-Slovakkja 11-7.
Tneħħi t-telfa kbira mal-Olandiżi, l-avversarji tal-lum jistgħu jkunu tajbin iktar milli qed naħsbu u għalhekk il-coach Milan Cirovic żgur li għandu pjani addattati biex it-team jikseb l-iktar pożizzjoni għolja meta għandu team żagħżugħ li żgur se tiswielu fil-futur.
Fl-aħħar logħba minn Grupp C il-Maltin sabu lis- Serbja avversarji diffiċli ħafna tant li dawn ħarġu rebbieħa bl-iskor kbir ta’ 21-4 fejn minkejja li kellna xi players neqsin għal raġuni jew oħra ma jidhirx li kienu se jagħmlu xi differenza kontra team li huwa meqjus wieħed mill-favoriti li jiġu nkurunati champions tal-Ewropa.
Il-logħba kontra s-Sloveni se tibda fit-8.15 pm.
