Wara ż-żewġ telfiet li sofra kontra l-Ġermanja (15-5) u kontra ċ-Ċina (18-6), fir-Round Preliminari ta’ Grupp B tat-Tazza tad-Dinja tat-Tieni Diviżjoni, waslet l-ewwel rebħa għall-Maltin meta għelbu lill-Afrika t’Isfel bl-iskor ta’ 15-8 (3-4, 5-3, 5-1, 2-0).
Il-players tagħna insew id-diżappunt taż-żewġ logħbiet preċedenti għalkemm l-ewwel sessjoni tat indikazzjoni ta’ andament negattiv meta tlifna l-ewwel sessjoni bl-iskor ta’ 4-3, bil-goals jaslu minn doppjetta ta’ Liam Galea u minn Dino Zammit.
Iżda huma qatt ma ħarsu lura minħabba li rebħu li t-tlieta sessjonijiet sussegwenti.
Fit-tieni sessjoni, Jeremy Abela, Benjamin Cachia, Nikolai Zammit u Sam Gialanze kisbu d-draw għal 7-7, biex imbagħad Gianlanze daħħal lit-team jistrieħ fil-vantaġġ ta’ 8-7.
Fit-tielet sessjoni, il-Maltin urew il-qawwa tagħhom meta skorjaw ħames goals kontra wieħed, bl-iskorers ikunu Nikolai Zammit, Ben Plumpton, Nicholas Bugelli, Mark Castillo u Liam Galea … għal skor parzjali ta’ 13-8.
Bil-logħba mirbuħa u mitlufa, fl-aħħar sessjoni l-Maltin issiġillaw ir-rebħa b’żewġ goals oħra minn Sam Gialanze u Benjamin Cachia.
L-iskwadra Maltija hija komposta minn Jake Tanti, Mark Castillo, Liam Galea 1, Nicholas Bugelli, Sam Gialanze, Benjamin Cachia, Ben Plumpton, Jordan Camilleri, Jeremy Abela, Nikolai Zammit, Alec Fenech, Dino Zammit, Matthew Castillo.
