Minn MELVIN FARRUGIA
L-Għaqda Dinjija tas-Saħħa qalet li hu vera rari li nies infettati bil-Coronavirus, u li ma jkollhomx sintomi, jinfettaw lil ħaddieħor.
Minkejja li hemm numru ta’ persuni li jittestjaw pożittivi iżda ma jkollhomx sintomi, hu maħsub li l-parti l-kbira ta’ dawn l-infezzjonijiet ma jiġux mgħoddija.
Madankollu, jidher li l-persuni jistgħu jgħaddu l-marda ftit qabel ma jiżviluppaw is-sintomi.
Hekk qalet il-Kap tal-Mard Ġdid tal-WHO, Maria Van Kerkhove li għamlet distinzjoni bejn tliet kategoriji ta’ każi. Dawn huma persuni li qatt ma jiżviluppaw sintomi; dawk pożittivi iżda li sa dak iż-żmien ma jkollox sintomi iżda li mbagħad ikollhom; u dawk li jkollhom biss ftit sintomi meta jirrealizzaw li għandhom il-Coronavirus.
Van Kerkhove qalet li skont il-parti l-kbira tal-evidenza, dawk il-persuni li qatt ma jiżviluppaw sintomi m’għandhomx irwol sinjifikanti fil-proċess li jgħaddu l-virus lil ħaddieħor.
