Raġel li qed jiskonta sentenza ta’ 32 sena ħabs b’rabta mal-qtil ta’ Joseph Carabott, tressaq fil-Qorti fejn wieġeb mhux ħati għal akkużi dwar traffikar ta’ droga.
Mohamed Anas Boualam ta’ 38 sena u ta’ nazzjonalità Marokkina, ġie mixli li kellu fil-pussess tiegħu l-ecstasy f’ċirkostanzi li juru li d-droga ma kinitx għall-użu esklussiv tiegħu.
Huwa mifhum li Boualam inqabad bid-droga meta ġie arrestat b’rabta mal-hold-up fiż-Żurrieq fejn kien aggredit b’mod vjolenti Carabott.
Il-Prosekuzzjoni qed titmexxa mill-Avukat Julian Scicluna mill-Uffiċċju tal-Avukat Ġenerali flimkien mal-Ispetturi John Leigh Howard. L-Avukat tal-Għajnuna Legali Francois Dalli deher għall-imputat.
F’Jannar li għadda, Donna Borg Sciberras kienet ikkundannata 28 sena ħabs wara li ammettiet l-involviment tagħha f’dan il-każ. B’rabta mal-istess każ qed jiġi mixli wkoll Zouhair Hadoumi li qed iwieġeb mhux ħati.