Nhar it-Tnejn li għadda, l-attenzjoni fil-football Ingliż kienet waħda partikolari hekk kif tħabbar il-verdett fil-kawża legali ta’ Manchester City kontra l- Premier League dwar ir-regoli tal-kampjonat dwar ftehimiet kummerċjali li jinvolvu s-sidien tal-clubs.
Manchester City, li huma proprjetà tas-City Football Group appoġġjat minn Abu Dhabi, kellhom xi ilmenti milqugħa, b’żewġ aspetti tar-regoli tat-tranżazzjoni tal-parti assoċjata (APT) meqjusa illegali minn tribunal.
Iżda l-Premier League sostnew li t-tribunal ċaħad il-maġġoranza tal-isfidi ta’ Manchester City u “approva l-għanijiet ġenerali, il-qafas u t-teħid tad-deċiżjonijiet tas-sistema APT”.
L-APTs huma mmirati lejn il-valur ta’ ftehimiet ta’ sponsors ma’ kumpaniji marbuta mas-sidien tal-clubs.
Dan il-każ mhuwiex direttament relatat mal-kummissjoni dixxiplinarja tal- Premier League li se tisma’ l-115-il akkuża kontra s-City talli allegatament kisru ir- regolamenti finanzjarji, li wħud minnhom imorru lura għall-2009.
It-tribunal – f’dokument ta’ 175 paġna – iddeċieda li s-self tal-azzjonisti m’għandux jiġi eskluż mill-ambitu tar-regoli tal-APT u li xi emendi li saru fi Frar mill- Premier League m’għandhomx jinżammu.
F’dan il-proċess ta’ arbitraġġ, Chelsea, Newcastle u Everton kollha aġixxew bħala xhieda għas-City.
Xhieda favur il-Premier League kienu jinkludu lil Manchester United, Liverpool, Arsenal, Tottenham, Brighton u West Ham filwaqt li Brentford, Bournemouth, Fulham u Wolves kitbu ittri b’appoġġ għar- regoli.
Peró wara dan il-verdett l-ebda club ma ried jagħti l-kummenti tiegħu.
Min-naħa ta’ Simon Leaf, sieħeb u kap tal-isport fid- ditta legali Mishcon de Reya, qal:
“Filwaqt li d-deċiżjoni hija waħda mbarazzanti għall-Premier League, minħabba li f’żoni ristretti nstabu li r-regoli tagħhom huma illegali, b’mod ġenerali din id-deċiżjoni tikkonferma li l-maġġoranza l-kbira tar-regoli APT huma tabilħaqq legali.”
Waqt li kien qed jitkellem fis-Summit Globali tal-Liġi fl-Isport, Leaf żied jgħid: “Għalhekk, filwaqt li nistgħu nistennew li naraw xi bidliet fir-regoli fil-futur qrib, b’mod ġenerali din mhix rebħa kbira għal Manchester City b’xi medda ta’ immaġinazzjoni.”
Il-Premier League sejjaħ laqgħa għall-ġimgħa d- dieħla biex jiddiskuti l-implikazzjonijiet tas-sentenza.
X’INHUMA L-APTs?
L-APTs huma ftehimiet kummerċjali li jinvolvu clubs u kumpaniji li magħhom għandhom rabtiet mill-qrib. Ir-restrizzjonijiet fuq il-valuri ġusti tas-suq (FMVs) ġew introdotti f’Diċembru 2021, ftit wara l-akkwist tal-club ta’ Newcastle immexxi mill- Arabja Sawdija.
Il-Kampjonat Premier għandu d-dritt li jivvaluta l-valur ta’ ftehimiet bħal dawn biex jiżgura li ma jkunux ġew minfuħa u li jista’ jagħti lill-clubs aktar x’jonfqu skond ir-regoli finanzjarji attwali.
Iżda dawn ir-regoli nbidlu wara votazzjoni fi Frar li bid-deċiżjoni ma tkunx waħda unanima.
Tnax-il club ivvutaw biex jinbiddlu r-regoli, bi tnejn astjenew u sitta jivvutaw kontra t-tibdil.
Dawk il-bidliet fir-regoli kienu jinvolvu emendi għad-definizzjoni FMV, u ċaqliq tal-piż tal-prova lil club biex juri li tranżazzjoni hija fil-valur tas-suq ġust.
Din il-battalja legali bdiet f’Ġunju li għadda.
Il-Premier League u Manchester City, it-tnejn qalu li laqgħu s-sejbiet tat-tribunal imħabbra nhar it-Tnejn, b’kull naħa tiffoka fuq l-elementi favur tagħhom.
Bla dubju, din ir-rebħa se tagħti lok għal aktar bidliet li se jiggwadanjaw minnhom il-clubs il-kbar.
