Il-mexxej tal-grupp merċenarju Wagner, Yevgeny Prigozhin huwa l-wiċċ tal grupp u wara l-attentat ta’ kolp ta’ stat tiegħu nhar is-Sibt għadda, spiċċa eżiljat fil-Belarus.
Esperti militari issa qed isostnu li dak kollu li seħħ fi tmiem il-ġħimgħa li għaddiet aktar se jġib fi tmiemu l-Grupp Wagner minn kif inhuwa llum tant li l-futur ta’ Prigozhin u tal-grupp militari privat tiegħu huwa dubjuż.
Prigozhin, ex bejjiegħ tal-hotdogs li sar kap tal-grupp merċenarju, kien kritiku feroċi għal ‘elite’ militari tar-Russja, prinċipalment il-ministru tad-difiża Sergei Shoigu u l-kap ġenerali tal-forzi Russi, Valery Gerasimov.
L-ammutinament armat tiegħu fi tmiem il-ġimgħa ntemm bi ftehim bejn il-Kremlin u Prigozhin nnifsu li ssarraf mill-medjazzjoni tal-President tal-Belarus Alexander Lukashenko, filwaqt li t-termini eżatti tal-ftehim mhumiex ċari u wisq inqas magħrufin.
Minn wara dak il-ftehim, Prigozhin ħareġ messaġġ awdjo, l-ewwel darba li tkellem minn meta abbanduna l-marċ lejn Moska. F’filmat ta’ 11-il minuta huwa ddefendi bis-sħiħ l-hekk imsejjaħ “marċ għall-ġustizzja” filwaqt li sostna li ma kienx qed jipprova jwaqqa’ lil Putin b’kolp ta’ stat.
Xi esperti jgħidu li ċaqliq lejn il-Belarus jimmarka t-tmiem tal-Grupp Wagner fil-forma attwali tiegħu, iżda jżidu jgħidu wkoll li jista ‘jkun hemm lok għal xi ħaġa oħra fil-futur.
L-analista militari Sean Bell jemmen li l-ftehim ma jfissirx li Putin mhux se juża gruppi merċenarji, iżda Prigozhin hija l-problema, mhux il-Grupp Wagner.
Prigozhin, li l-forzi tiegħu kienu ta’ vantaġġ ewlieni għas-suċċessi tar-Russja fuq il-linja ta’ quddiem fl-Ukrajna, inkluż fil-battalja għal Bakhmut, akkuża kemm-il darba lil Shoigu u Gerasimov li mminaw il-gwerra fl-Ukrajna.
Rigward issa x’jista’ jiġri lil Prigozhin, l-analista Bell jgħid li hemm ħafna affarijiet mhux magħrufa, iżda żied jgħid li biex mar il-Belarus u jibqa’ barra mill-aħbarijiet għal xi żmien jista’ jkun ifisser it-tmiem mhux f’waqtu tiegħu.
Wara l-ammutinament, Vladimir Putin akkuża lil Prigozhin bi tradiment u dawk kollha involuti kienu se jpattuha qares. Iżda, wara l-ftehim, il-Kremlin neħħa l-akkużi kriminali kontra Prżigozhin u l-merċenarji tiegħu.
Il-mistoqsija issa hi jekk Wagner Group hux se jiġi xolt. Kien hemm ukoll mistoqsijiet dwar jekk il-Grupp Wagner hux se jiġi assorbit fl-armata Russa.
Wara l-avvenimenti ta’ tmiem il-ġimgħa, il-Kremlin qal li ma kienux se jittieħdu passi kontra l-ġellieda ta’ Wagner bħala rikonoxximent tas-servizz preċedenti tagħhom fir-Russja, u li kieku ma ħadux sehem fl-ammutinament setgħu jiffirmaw kuntratti mal-ministeru tad-difiża.
Xi analisti raw ir-rewwixta ta’ Prigozhin bħala mossa ddisprata biex isalva lil Wagner milli jiġi żarmat wara ordni li l-kumpaniji militari privati kollha ffirmaw kuntratti mal-Ministeru tad-Difiża tar-Russja.
Il-gvern Russu qabel ċaħad l-involviment tiegħu mal-grupp Wagner u nsisti li l-grupp ma jeżistix legalment minħabba li l-kuntratturi militari privati mhumiex legali fir-Russja
Filwaqt li l-avvanz ta’ Prigozhin u l-grupp li jmexxi qajjem taħwid ġewwa r-Russja, il-grupp għandu wkoll interessi u storja f’pajjiżi oħra madwar id-dinja.
Il-grupp Wagner huwa organizazzjonui militarili jopera wkoll ‘il barra mir-Russja.
Għandu sehem kbir f’negozju internazzjonali mifrux b’interessi fil-minjieri fl-Afrika u fil-Lvant Nofsani. Ħa sehem ukoll fi ġlied fil-Libja, is-Sirja, ir-Repubblika Ċentrali-Afrikana u l-Mali, fost pajjiżi oħra.
Huwa partikolarment attiv fl-Afrika u jopera f’20 pajjiż, skont dejta miġbura miċ-Ċentru għall-Istudji Strateġiċi u Internazzjonali (CSIS) Transnational Threats Project.
Fl-Afrika, il-grupp Wagner għandu sehem fil-kunflitt ċivili fil-Libja fejn ir-Russja bagħtetha tagħmir militari inkluż ajruplani tal-ġlied u vetturi korazzati, skont ma qal id-Dipartiment tad-Difiża tal-Istati Uniti fl-2020.
Sadanittant, il-ġellieda tal-Grupp Wagner kienu intbagħtu wkoll fir-Repubblika Ċentrali-Afrikana, fejn wara ġew akkużati li qatlu nies ċivili u attakkaw lill-suldati tal-missjoni tal-paċi tan-Nazzjonijiet Uniti hekk kif bdiet il-gwerra ċivili.
