Żewġ nisa sofrew ġrieħi f’inċident li seħħ ilbieraħ, għall-ħabta tat-3:30 p.m fi Triq Ta’ Wied il-Mielaħ, fl-Għarb, Għawdex.
Minn investigazzjoni li saret irriżulta li Franċiża ta’ 34 sena tilfet il-kontroll tal-quadbike tat-tip Adly li kienet qed issuq. Fuq il-quadbike kien hemm ukoll Franċiża oħra ta’ 26 sena.
Fuq il-post issejjaħ tim mediku li ta l-ewwel għajnuna u ambulanza li ħadet liż-żewġ persuni l-Isptar Ġenerali ta’ Għawdex għall-aktar kura. Aktar tard il-mara li kienet qiegħda ssuq ġiet iċċertifikata bi ġrieħi gravi filwaqt li l-passiġġiera sofriet minn ġrieħi ħfief.
L-investigazzjonijiet tal-Pulizija dwar dan l-inċident għadhom għaddejjin.
