Kien għall-ħabta tas-7.30am meta l-Pulizija fl-Għassa tar-Rabat Għawdex ġew informati li kien seħħ inċident bejn karozza u mutur fi Triq Santa Katerina fix-Xewkija.
Mill-ewwel investigazzjonijiet jirriżulta li l-ħabta seħħet bejn mutur tal-għamla Kentoya li kien misjuq minn raġel ta’ 66 sena residenti Ta’ Sannat u karozza Ford Fusion li kienet misjuqa minn raġel ta’ 44 sena residenti x-Xewkija.
Mal-ħabta s-sewwieq tal-mutur spiċċa mal-art.
Fuq il-post mar tim mediku b’ambulanza li assistew lis-sewwieqa. Is-sewwieq tal-karozza ma sofra l-ebda ġrieħi filwaqt li tal-mutur ittieħed l-Isptar Ġenerali t’Għawdex għal aktar kura.
Intant, ftit tal-ħin wara għall-ħabta tat-8.10am l-istess uffiċjali tal-Pulizija ġew informati li kienet seħħet ħabta bejn karozza u mutur fi Triq San Anard – eżatt quddiem l-entratura tal-Lidl.
F’dan l-inċident kien hemm involuti Toyota Vitz li kienet misjuqa minn raġel ta’ 39 sena residenti x-Xagħra u mutur Honda misjuq minn raġel ta’ 22 sena residenti x-Xagħra.
Fuq il-post mar tim mediku mill-Isptar Ġenerali t’Għawdex li ħadu s-sewwieq tal-mutur l-isptar għal aktar kura, filwaqt li s-sewwieq tal-karozza ma sofra l-ebda ġrieħi.
Il-kundizzjoni taż-żewġ sewwieqa s’issa għadha mhix magħruf.
Il-pulizija mill-Għassa tar-Rabat Għawdex qegħdin jinvestigaw dawn iż-żewġ inċidenti.
