Żewġ sewwieqa ta’ muturi qed isofru minn ġrieħi ta’ natura gravi wara li kienu involuti f’inċidenti separati tat-traffiku.
L-ewwel inċident seħħ ilbieraħ, għall-ħabta tas-1.30 p.m. fi Triq Pantar, Ħal Lija, xħin seħħet ħabta bejn Isuzu Elf, misjuq minn raġel ta’ 28 sena residenti l-Qrendi u mutur Honda NSC110 misuq minn raġel ta’ 31 sena residenti l-Għargħur.
Is-sewwieq tal-mutur ingħata l-għajnuna minn tim mediku, ittieħed l-isptar b’ambulanza u ġie ċċertifikat li sofra ġrieħi gravi.
It-tieni inċident seħħ illum, għall-ħabta tas-6.00 a.m. fi Triq il-Wied tal-Imsida. Minn stħarriġ li sar fuq il-post irriżulta li seħħet ħabta bejn Toyota Yaris, misjuqa minn raġel ta’ 59 sena residenti l-Qrendi u mutur Super Soco TC Max, misjuq minn raġel ta’ 26 sena residenti Raħal Ġdid.
Fuq il-post issejjaħ tim mediku sabiex jassisti lis-sewwieq tal-mutur u ttieħed permezz t’ambulanza fl-Isptar Mater Dei għall-kura meħtieġa. Aktar tard, huwa kien iċċertifikat bi ġrieħi gravi.
L-investigazzjonijiet mill-Pulizija b’rabta ma’ dawn l-inċidenti għadhom għaddejjin.
