Stħarriġ li jsir kull xahar mill-Kummisjoni Ewropea fost in-negozji u l-konsumaturi fost il-pajjiżi kollha tal-Unjoni Ewropea jindika li matul Marzu pajjiżna kellu valur tal-indiċi ta’ sentiment ekonomiku ta’ 109, jew 9% aktar mill-medja storika. Madwar l-Ewropa l-kunfidenza hija 4% anqas mill-medja storika.
Fil-fatt f’pajjiżna matul Marzu kien hemm titjib ta’ 15% fis-sentiment ekonomiku, mentri madwar l-Unjoni Ewropea kien hemm tnaqqis ta’ 1%. Tant li s-sentiment ekonomiku f’pajjiżna huwa l-aqwa minn fost il-pajjiżi kollha tal-Unjoni. Fl-industrija, il-kumpaniji Maltin intervistati sostnew li filwaqt li flaħħar xhur kien hemm tnaqqis ċkejken fil-produzzjoni, maġġoranza qawwija tal-azjendi qallu li qed jistennew li żieda qawwija fiż-żmien li ġej minkejja s-sitwazzjoni internazzjonali negattiva.
Tant li s-sentiment ekonomiku fost l-azjendi tal-manifattura huwa ferm aqwa mill-medja storika, ħaġa li tikkuntrasta bil-kbir malbqija tal-Ewropa fejn hemm pessimiżmu qawwi fost is-sidien tal-fabbriki. F’Malta s-sentiment fost il-familji huwa ferm aħjar mill-medja storika, u ferm aqwa mill-medja Ewropea.
Il-maġġoranza tal-familji ntervistati sostnew li jemmnu li s-sitwazzjoni finanzjarja tagħhom se titjieb fix-xhur li ġejjin. Tant li ħafna bassru li sejrin jonfqu aktar fix-xhur li ġejjin u minkejja dan xorta qed jistennew li jżidu t-tifdil tagħhom fix-xhur li ġejjin.
Min-naħa l-oħra l-operaturi fis-settur tal-bejgħ huma xi ftit xettiċi fuq is-sitwazzjoni, bis-sentiment kemxejn taħt il-medja storika, għalkemm huwa ferm aħjar minn dak f’ħafna pajjiżi Ewropej.
Min-naħa l-oħra s-sentiment fis-settur tal-kostruzzjoni f’Malta baqa’ sewwa ’l fuq mill-medja storika. Fis-servizzi wkoll kien hemm titjib qawwi fil-kunfidenza, bil-maġġoranza tal-azjendi f’pajjiżna sostnew li kellhom żieda fl-attivita fl-aħħar xhur u din se tkompli tikber.
Għaldaqstant l-aspettattivi fost l-operaturi fis-settur kienu aħjar mill-medja storika, kif ukoll aqwa mill-medja Ewropea, fejn is-sentiment huwa taħt il-livell storiku tiegħu.
Fl-istess ħin madwar is-setturi kollha jidher li hemm aspettativa anqas ta’ żieda fl-impjiegi meta mqabbel mal-aspettativi f’xhur preċedenti. Dan jista jkun indikazzjoni li numru ta’ azjendi qed ibiddlu l-mudell tagħhom u qed jibdew jużaw inqas żieda fil-ħaddiema meta affaċjati b’żieda fid-domanda.
