Fir-rabaʼ kwart tal-2024, l-għadd sħiħ taʼ passiġġieri fuq cruise liners laħaq il-176,812, li jfisser żieda taʼ 4.6% fuq l-istess perjodu tas-sena taʼ qabel. Dan ħareġ minn statistika li ġiet ippubblikata mill-Uffiċju Nazzjonali tal-Istatisika (NSO).
L-NSO tirraporta li fl-istess perjodu żaru Malta 92 vapur tal-cruise liners, żieda ta’ 10 meta mqabblin mal-istess perjodu taʼ sena qabel. Il-passiġġieri li għaddew minn Malta sabiex komplew il-vjaġġ tagħhom lejn xi mkien ieħor kienu jagħmlu l-maġġoranza assoluta tat-traffiku kollu, u laħqu l-166,564 jew 94.2%. Bħala medja, kull bastiment li kien irmiġġat f’Malta ġarr 1,922 passiġġier, 140 inqas mis-sena ta’ qabel.
Fl-istess statisika ġie rraportati li l-passiġġieri mill-Istati Membri tal-UE kienu jgħoddu mas-36.2% tat-traffiku kollu. Is-swieq ewlenin kienu dak Taljan li laħaq 10.2% tal-passiġġieri kollha, segwit minn dak Ġermaniż bi 8.8% tal-passiġġieri. L-għadd sħiħ ta’ passiġġieri minn pajjiżi mhux tal-UE laħaq il-112,806, li minnhom 18.1% kienu ġejjin mir-Renju Unit u 44.8% kienu ġejjin mill-Istati Uniti.
Il-passiġġieri nisa laħqu 54.1% tat-total. L-akbar ammont taʼ passiġġieri kienu fl-età taʼ bejn is-60 u d-79 sena – 46.2%. Warajhom, kien hemm dawk li kienu fl-età taʼ bejn l-40 u d-59 sena – 27.4%.
Intant, l-istess rapport tal-NSO jitkellem dwar kemm għaddew passiġġieri fuq cruise lineres f’pajjiżna matul is-sena li għaddiet.
Fil-fatt fl-2024, l-għadd sħiħ taʼ passiġġieri laħaq it-849,088, li 41.5% minnhom kienu ġejjin minn pajjiżi tal-UE.
Il-biċċa l-kbira tal-passiġġieri kienu nisa u ammontaw għal 456,176, jew 53.7% tat-total. Fost il-gruppi tal-età, l-akbar grupp taʼ passiġġieri kellhom bejn is-60 u d-79 sena, u laħqu t-317,033 – 37.3%. Warajhom, kien hemm il-passiġġieri li kellhom bejn l-40 u d-59 sena, li laħqu 256,761 – 30.2%.
Kien hemm 363 żjara taʼ vapuri tal-cruise liners tul is-sena, bʼmedja taʼ 2,339 passiġġier fʼkull waħda, apparagun tat-309 żjajjar u medja taʼ 2,636 passiġġier fʼkull waħda fis-sena 2023.
