Malta, flimkien ma’ Xjenza Malta, se tkun qed taħdem biex tikseb sħubija eqreb ma’ CERN, biex b’hekk tkun tista’ toffri opportunitajiet għal taħriġ ta’ livell internazzjonali, esplorazzjoni xjentifika u tagħlim ibbażat fuq is-suġġetti STEAM, kif ukoll aċċess għal netwerks globali ta’ riċerka.
Il-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, Clifton Grima, ħabbar dan fi tmiem żjara uffiċjali flimkien ma’ uffiċjali ta’ Xjenza Malta fl-Iżvizzera, fuq stedina ta’ CERN – l-organizzazzjoni Ewropea għar-Riċerka Nukleari, wieħed mill-akbar u l-aktar ċentri rinomati għar-riċerka xjentifika fid-dinja.
Waqt iż-żjara tiegħu, il-Ministru għamel enfasi ċara fuq il-ħsieb strateġiku ta’ Malta li ssaħħaħ ir-riċerka u l-innovazzjoni. Huwa spjega li peress li Malta hija waħda minn żewġ pajjiżi tal-Unjoni Ewropea li għadha barra minn CERN, beda b’mod uffiċjali l-vjaġġ biex pajjiżna jsir membru assoċjat.
“Ninsab f’CERN b’għan wieħed: li niftħu l-bibien għal aktar riċerka u innovazzjoni f’Malta. Dan huwa l-ewwel pass f’viżjoni nazzjonali li tqabbad lill-aqwa mħuħ tagħna ma’ xjentisti ta’ livell dinji, u tiggarantixxi li Malta jkollha leħen dirett fl-iżvilupp tat-teknoloġiji tal-futur. Għar-riċerkaturi, għall-edukaturi u għall-istudenti Maltin, dan mhux simbolu – huwa investiment strateġiku fil-futur tagħhom,” saħaq il-Ministru Grima.
Malta b’hekk tkun f’pożizzjoni li tikkompeti fuq livell globali, b’investiment f’kapital intellettwali u b’viżjoni li tibni pont dirett bejn talent lokali u tmexxija xjentifika internazzjonali.
Ir-rappreżentant Permanenti ta’ Malta għan-Nazzjonijiet Magħquda u Organizzazzjonijiet oħra f’Ġinevra, Randolph Debattista, waqt l-istess żjara ddikjara li: “Hemm entużjażmu fi ħdan CERN biex jaraw lil Malta tissieħeb bħala membru assoċjat. Kif stajna naraw waqt iż-żjara, dan se jkun pass storiku biex riċerkaturi Maltin issa mhux biss jipparteċipaw, imma jmexxu huma proġetti fl-ikbar ċentru tar-riċerka fid-dinja.”
Preżenti għaż-żjara kien hemm ukoll diriġenti minn Xjenza Malta, fosthom il-Kap Eżekuttiv, Silvio Scerri, li saħaq fuq dan il-proċess inizjali u strateġiku: “Din iż-żjara sservi bħala pedament għal kollaborazzjoni ħafna iktar mill-qrib ma’ CERN. Għalkemm għadna fl-ewwel stadju, hija opportunità biex noħolqu triq ta’ tkabbir xjentifiku u innovattiv għat-talent Malti.”