Illum qegħdin infakkru wieħed mill-aktar avvenimenti traġiċi u kruċjali fl-istorja tal-umanità, l-attakki nukleari fuq Hiroshima u Nagasaki, li bidlu għal dejjem il-mod kif id-dinja tħares lejn il-gwerra u l-qawwa tal-armi nukleari.
Kien fis-6 ta’ Awwissu 1945, meta bomba atomika waqgħet fuq Hiroshima, u fi ftit sekondi qerdet kważi belt sħiħa. Tliet ijiem wara, fid-9 ta’ Awwissu, Nagasaki sofriet l-istess destin. F’dawk il-mumenti ntilfu għexieren ta’ eluf ta’ ħajjiet, filwaqt li ħafna oħrajn indarbu serjament jew mietu fil-ġimgħat, ix-xhur u s-snin ta’ wara minħabba l-effetti tar-radjazzjoni.
Niftakru kif ġie rrapurtat li l-qawwa tal-isplużjonijiet qerdet djar, skejjel, sptarijiet u infrastruttura sħiħa, u ħalliet warajha xena ta’ devastazzjoni li qatt ma kienet dehret qabel.
Madanakollu, naqblu li l-konsegwenzi ma spiċċawx mal-isplużjonijiet. Għall-kuntrarju, il-feriti baqgħu għal snin twal. Eluf ta’ persuni li rnexxielhom isalvaw komplew ibatu minn mard serju, fosthom diversi tipi ta’ kanċer u problemi kroniċi oħra tas-saħħa.
L-effetti laqtu wkoll lil ġenerazzjonijiet ta’ wara. Kien hemm tħassib u studji estensivi dwar l-impatt tar-radjazzjoni fuq it-tfal li twieldu wara l-attakki, filwaqt li ħafna familji għexu għal snin twal fil-biża’ u fl-inċertezza dwar is-saħħa tagħhom.
Minn perspettiva storika, dawn l-attakki wasslu għat-tmiem tat-Tieni Gwerra Dinjija fil-Paċifiku, iżda fl-istess ħin fetħu era ġdida – dik tal-armi nukleari. Minn dak iż-żmien ‘l hawn, id-dinja għexet taħt it-theddida ta’ armi li għandhom il-kapaċità jeqirdu bliet sħaħ
Illum, aktar minn tmenin sena wara, il-messaġġ li joħroġ minn dawn iż-żewġ bliet għadu wieħed ċar u relevanti. It-tifkira tal-vittmi mhijiex biss tifkira storika, iżda appell kontinwu biex il-komunità internazzjonali tkompli taħdem favur il-paċi, id-diżarm nukleari u r-rispett lejn il-ħajja umana.
Hija tfakkira li l-konsegwenzi tal-gwerra ma jispiċċawx meta jieqaf il-ġlied, iżda jistgħu jibqgħu jinħassu għal ġenerazzjonijiet sħaħ.
Meta nfakkru lil dawk li tilfu ħajjithom u lil dawk li għexu bit-tbatija li ħallew warajhom dawn l-attakki, inkunu qed nonoraw il-memorja tagħhom u fl-istess ħin nerġgħu nsaħħu l-impenn tagħna favur dinja aktar sigura, aktar ġusta u aktar paċifika.
Hiroshima u Nagasaki jibqgħu twissija qawwija li l-paċi qatt m’għandha tittieħed bħala fatt, iżda hija valur li jeħtieġ jinbena u jiġi mħares kuljum.
