Il-Gvern ser jibda jimplimenta żewġ miżuri mħabbra fil-Baġit għal din is-sena, u li jolqtu l-aktar ġenituri self-employed.
L-ewwel miżura hija dik favur ġenituri prospettivi li jaħdmu għal rashom u li jagħmlu trattament tal-IVF. Dan il-Gvern, fl-aħħar snin għin diversi familji li għamlu t-trattament tal-IVF u assista permezz ta’ sapport kontinwu u anke fejn jidħol il-leave. Issa, imiss li din l-għajnuna għandha tkun estiża anke għal dawk il-persuni self-employed.
B’hekk ġenituri prospettivi li jaħdmu għal rashom se jibbenefikaw minn 100 siegħa leave mħallas għal kull ċiklu ta’ trattament. L-omm prospettiva se tkun intitolata għal 60 siegħa leave, filwaqt li l-konjugi/partner ikunu intitolati għal 40 siegħa oħra.
Dan il-benefiċċju se jkun qed jitħallas bir-rata tal-paga minima nazzjonali għaż-żewġ ġenituri prospettivi, u b’dan is-sapport jagħti aktar lok ta’ mistrieħ u rkupru, dan filwaqt li l-ġenituri jistgħu jattendu appuntamenti mingħajr stress żejjed.
Il-Ministru għall-Politika Soċjali u d-Drittijiet tat-Tfal, Michael Falzon stqarr illi dan il-Gvern ser ikompli jinvesti f’sessjonijiet ta’ terapija regolari, kemm individwali u anke fi gruppi, akkumpanjati minn appoġġ psikoloġiku fit-tul u anke dak akkademiku.
‘‘Ir-realtà li l-IVF mhix biss proċedura medika – hija esperjenza emozzjonali u soċjali. U lil hinn mit-trattament kliniku, nifhem li ħafna persuni li jgħaddu minn dan it-trattament jixtiequ aktar empatija, għarfien, u bidla kulturali’’, stqarr il-Ministru Michael Falzon.
Minn naħa tiegħu, is-Segretarju Parlamentari, Andy Ellul tkellem dwar il-miżura tal-estensjoni tad-dritt għal leave ta’ paternità lil min jaħdem għal rasu. Dr Ellul saħaq li l-leave tal-partenità diġa jingħata lil dawk li huma impjegati. Issa se jibda jingħata wkoll lil dawk li jaħdmu għal rashom bil-ħlas ta’ għaxart ijiem jew 80 siegħa fl-okkażjoni tat-twelid jew adozzjoni fil-familja.
Ir-rata tal-ħlas hija bbażata fuq il-paga minima nazzjonali. Din il-miżura tapplika wkoll għal koppji LGBTIQ+.
Intant sal-aħħar ta’ din il-ġimgħa jiskatta l-proċess sabiex jinfetħu l-applikazzjonijiet għal dawk il-persuni illi jistgħu jkunu eliġibbli għal miżura tal-IVF. Fl-istess ħin għaddej ix-xogħol sabiex fil-jiem li ġejjin tiġi implimentata l-miżura tal-‘parental leave’ għas-‘self employed’.
