Sal-aħħar ta’ Settembru li għadda kien hemm 105 persuni bil-kundizzjoni ta’ obeżità morbida jistennew li jsirilhom intervent fl-isptar Mater Dei.
Dan it-tagħrif ingħata mid-Deputat Prim Ministru u Ministru tas-Saħħa Dr Chris Fearne bi tweġiba għal mistoqsija parlamentari tad-Deputat Nazzjonalista Ivan Bartolo.
Fl-istess waqt, il-Ministru Fearne qal ukoll li hemm 2210 pazjenti li qed jistennew biex issirilhom opertazzjoni fl-iSpeċjalita tal-Kirurġija Ġenerali.
Għal mistoqsija parlamentari oħra din id-darba magħmula mid-Deputat Laburista Oliver Scicluna, il-Ministru tas-Saħħa qal li minn meta nfetħet il-Gender Wellbeing Clinic f’Novermbru 2018 sal-lum kien hemm 258 persuni li kienu riferuti għal din il-klinika biex jagħmlu valutazzjoni inizjali, bl-ikbar għadd ikun minn dawk li fittxew għajnuna psikjatrika.
Dwar servizzi li jingħataw f’din il-klinika, id-Deputat Prim Ministru sostna li kull klijent huwa meqjus b’mod individwali bi pjan ta’ kura imfassal minn tim multidixxiplinarju bilgħan li jiġu mtejba l-benesseri fiżiku u psikoloġiku tal-individwu.
Sa issa kien hemm 26 persuna li kienu ‘discharged’ minn dan is-servizz, b’10 persuni li riedu jwaqqfu l-proċess ta’ tranżizzjoni tal-ġeneru.