Raġel minn Kentucky li kien jesprimi b’mod apert l-interess tiegħu li jagħmel sess mat-tfal ingħata 70 sena ħabs, is-sentenza massima permessa taħt il-liġi lokali. Dan l-eks infermier “jemmen li sess mat-tfal żgħar ħafna (erba’ snin) huwa dritt legali tiegħu”.
Keram Christensen ta’ 40 sena kien arrestat l-ewwel darba f’Awwissu tal-2019. Huwa ammetta li kien ħati li fil-pussess tieghu kellu numru kbir ta’ materjal pornografiku tat-tfal. Fis-sentenza, l-imħallef Gregory Bartlett qal li Christensen “milli jidher immaġina komunità fejn is-sess mat-tfal huwa aċċettabbli iżda komunità ta’ dan it-tip ma teżistix u qatt mhi se teżisti fil-kontea Kenton”.
“Meta ngħid inrid lit-tfal, vera nrid it-tfal”
Uffiċjali tal-pulizija ta’ Covington saru jafu dwar Christensen wara li impjegat tas-sit tad-dating “Match.com”, fuq il-profil ta’ Christensen, innota kitba b’terminoloġija suspettuza. Il-prosekuzzjoni qalet li fuq il-profil ta’ Christensen kien hemm miktub ‘meta ngħid inrid it-tfal, vera nrid it-tfal!’.
Investigaturi kisbu warrant biex jagħmlu tfittxija fir-residenza ta’ Christensen. Hawnhekk il-forzi tal-ordni fil-kompjuter u apparat teknoloġiku tiegħu sabu ammont esaġerat ta’ materjal pornografiku tat-tfal. Il-wallpaper fuq il-mowbajl tiegħu jingħad li kellu jidhru żewġt itfal f’atti sesswali.
“Milli jidher immaġina komunità fejn is-sess mat-tfal huwa aċċettabbli iżda komunità ta’ dan it-tip ma teżistix u qatt mhi se teżisti fil-kontea Kenton” – imħallef
Christensen barra dawn il-provi kollha kontrih, kien huwa stess li kiteb u ppubblika novelli dwar abbuż sesswali fuq it-tfal li magħhom inkluda ritatti ta’ pornografija tat-tfal imniżżla minn fuq l-Internet. L-eks infermier anke wasal biex iwaqqaf negozju taħt l-isem ta’ “Nautica Productions” bil-għan li jkun jista’ jippubblika l-kotba tiegħu aktar faċilment.
Christensen kien intefa’ l-ħabs imma f’Ottubru tal-2019 ħallas il-garanzija u ngħata l-libertà proviżorja. F’April 2021 huwa reġa’ ġie arrestat wara li investigaturi qabduh jikser il-kundizzjonijiet imposti fuqu. Fost dawn Christensen reġa’ daħħal fis-siti tad-dating, ħaġa li kienet ipprojbita lilu. Il-Pulizija ngħataw warrant ieħor biex ifittxu fir-residenza tas-suspettat u sabu li dan reġa’ ġemma’ għadd ta’ materjal pornografiku tat-tfal, kif ukoll li l-password tal-wi-fi tiegħu kienet “pedofelu”.
Skont dokumenti tal-qorti Christensen kien infermier ikkwalifikat u għal perjodu ħadem fit-taqsima tal-kura intensiva fi sptar. Fil-jum tal-arrest huwa kien ukoll membru tal-Kummissjoni għad-Drittijiet tal-Bniedem ta’ Covington.
L-avukata Emily Arnzen, li kienet parti mit-tim tal-prosekuzzjoni fil-każ ta’ Christensen, qalet li, “l-azzjonijiet tal-akkużat kienu kemm diretti, kif ukoll diżgustanti. Huwa mostru… Il-maġġoranza tal-pedofeli li tfajt il-ħabs jistħu b’dak li għamlu imma dan tassew jemmen li għandu dritt kostituzzjonali li jweġġa’ lit-tfal. Ħaġa li ma titwemminx”
