95.7% iridu jerġgħu jaraw il-vouchers; 54% jaħsbu li l-aħjar żmien biex jerġgħu jużawhom huwa żmien il-Milied
Minn Maria Azzopardi
85.2% tan-nies saħqu li l-vouchers mogħtija mill-gvern bħala parti mir-riġenerazzjoni, għenu kemm lilhom personali kif ukoll lill-ekonomija. 56.9% minn dawn il-85.2% saħqu li kienu utli ħafna.
Dan ħareġ minn stħarriġ li sar minn Dr Vince Marmara li jikkonferma kemm l-iskema tal-vouchers kienet ta’ għajnuna kbira anke biex in-nies ikollhom iktar fiduċja biex joħorġu iżjed. Fil-fatt 54.9% tan-nies wieġbu li bis-saħħa ta’ inizjattiva bħal din ħassewhom aktar komdi u ħeġġewhom biex joħorġu u jonfqu l-flus.
L-istħarriġ juri li 95.7% tan-nies jixtiequ jerġgħu jaraw il-vouchers. Mistoqsija meta jaħsbu li huwa l-aħjar żmien biex jerġgħu jużaw il-vouchers, il-maġġoranza (54%) wieġbu li l-aħjar perjodu huwa fi żmien il-Milied.
Mistoqsija jekk jerġa’ jkun hawn is-sistema ta’ vouchers kif jixtiequ jużawhom, il-maġġoranza tan-nies (32.5%) qalu li kieku dan jagħmluh fi kwalunkwe tip ta’ xiri, filwaqt li 25.4% wieġbu f’ristoranti, akkomodazzjoni jew retail u servizzi.
82.8% wieġbu li kienu komdi kif waslu l-vouchers għandhom u ma jbiddlu xejn fil-proċess ta’ kif waslu.
Waqt business breakfast, il-Ministru għall-Ekonomija, Investiment u Negozji Żgħar Silvio Schembri qal li sal-bieraħ ġew utlizzati 81.2% tal-vouchers u l-iktar ġurnata li fiha ntużaw l-aktar vouchers kienet id-9 ta’ Awwissu.
