Il-goalkeeper ta’ Arsenal, Aaron Ramsdale, jista’ jkun sfurzat iħalli l-iskwadra tal-Ingilterra għall-partiti ta’ ħbiberija ta’ Marzu minħabba injury f’ġenbejh.
Wara li għamel id-debutt internazzjonali tiegħu fir-rebħa kbira ta’ 10-0 kontra San Marino s-sena l-oħra, Ramsdale kiseb sejħa mistennija għall-iskwadra għall-konfronti ta’ dan ix-xahar mal-Iżvizzera u l-Kosta tal-Avorju.
Madankollu, Ramsdale kien nieqes mill-iskwadra ta’ Arsenal li lbieraħ affaċċjat lil Aston Villa wara li weġġa’ ġenbejh fl-ewwel taqsima tat-telfa ta’ 2-0 tal-Erbgħa kontra Liverpool, b’Bernd Leno jibda minfloku.
Ramsdale issa huwa ‘dubjuż’ għall-impenji internazzjonali u x’aktarx se jkun sfurzat jirtira mill-iskwadra ta’ Gareth Southgate waqt li jirkupra.
F’dan l-istadju, is-severità tal-kwistjoni ta’ Ramsdale mhix ċara.
Il-goalkeeper ta’ 23 sena żamm 12-il clean sheet f’24 partita tal-Premier League għal Arsenal dan l-istaġun – Alisson Becker u Ederson biss għandhom record aħjar fl-ogħla livell tal-football Ingliż.
