Il-biljunarju Svizzeru, Hansjorg Wyss, stqarr li ġie offrut iċ-ċans li jingħaqad ma’ konsorzju ta’ sitta jew seba’ investituri oħra biex jixtru lil Chelsea għas-somma ta’ £2 biljuni.
Wyss, li għandu 86 sena, huwa rrappurtat li jiswa £4.3bn fejn qed juri interess li jixtri l-klabb ta’ Stamford Bridge mingħand Roman Abramovich, iżda biss f’konsorzju.
Il-biljunarju Russu Abramovich esprima pubblikament ix-xewqa tiegħu li jżomm is-sjieda ta’ Chelsea, iżda dan jista’ jkun impossibbli jekk il-Gvern tar-Renju Unit jimponi sanzjonijiet fuqu.
Wyss stqarr li se jħares lejn id-dettalji ta’ kwalunkwe ftehim possibbli iżda mhux għal din is-somma li qed tintalab.
“Abramovich qed jipprova jbiegħ il-vilel kollha tiegħu fl-Ingilterra, irid ukoll jeħles mill-klabb ta’ Chelsea malajr kemm jista’ jkun,” qal Wyss.
“Jien u tliet persuni oħra rċevejna offerta nhar it-Tlieta biex nixtru lil Chelsea mingħand Abramovich.
“Issa għandi nistenna erba’ sa ħamest ijiem. Abramovich bħalissa qed jitlob wisq. Chelsea għandhom jagħtuh £2 biljuni. Iżda Chelsea m’għandhomx flus. Mil-lum, ma nafux il-prezz eżatt tal-bejgħ. Peró mhux se nħallas £2 biljuni.
Nhar is-Sibt li għadda Abramovich ċeda t-tmexxija tal-club wara l-invażjoni tar-Russja fl-Ukrajna.
