Raġel ta’ 40 sena minn Ħal Luqa qed isofri minn ġrieħi serji wara li għall-ħabta tal-11:00 a.m. kien involut f’inċident waqt li kien għaddej b’xi xogħlijiet f’maħżen fi Triq l-Iskultur, f’Ħal Qormi
Minn stħarriġ illi sar irriżulta li r-raġel ħa xokk elettriku waqt li kien qed jaħdem, bil-konsegwenza li waqa’ minn fuq sellum li kien fuqu.
Fuq il-post issejjaħ tim mediku u ambulanza ħadet lill-vittma l-Isptar Mater Dei għall-kura meħtieġa, fejn ġie ċċertifikat bi ġrieħi serji.
Il-Maġistrat tal-Għassa Dr Joe Mifsud LL.D ġie infurmat bil-każ u ħatar inkjesta, filwaqt li l-investigazzjonijiet tal-Pulizija u tal-Awtorità għas-Saħħa u s-Sigurta fuq il-Post tax-Xogħol, għadhom għaddejjin.
