Il-vittma tal-isplużjonijiet fil-kumpless tan-nar San Ġużepp f’Ħal Kirkop huwa Leonard Camilleri ta’ 64 sena magħruf aħjar bħala Nardu ż-Żurrieqi.
Nardu huwa magħruf sew mad-dilettanti tan-nar tant li l-istorja tiegħu f’dan il-qasam hija waħda mżewqa. Dan ma kienx l-uniku inċident f’kumpless tan-nar li fih kien involut il-vittma tant li fl-2012 huwa kien sofra xi ġrieħi f’idejh (fir-ritratt) waqt li kien qiegħed jaħdem in-nar. Nardu kien ukoll detentur tal-istess kumpless lura fis-snin sakemm għal xi żmien kien irtira l-permess f’idejn ħaddieħor u waqaf milli jagħti l-kontribut tiegħu.
F’waħda mill-intervisti li kien ta fuq it-televiżjoni, Nardu kien tkellem dwar l-inċidenti u kif għalkemm dak il-ħin qisek tgħid ma titlax ’l hemm, imbagħad ’l hemm terġa’ tmur. Madanakollu dan is-sit jinsab infurmat li riċentament huwa reġa’ beda jaħdem in-nar sakemm sfortunatament seħħ l-inċident ta’ dalgħodu.
Bil-każ ġiet infurmata l-Maġistrat tal-Għassa Dr Claire Stafrace Zammit, li ħatret diversi esperti sabiex jassistuha fl-inkjesta li ġiet appuntata.
9:45 a.m: Jitilgħu għal tlieta dawk fl-Isptar
Hekk kif l-operazzjoni fil-post kellha tiġi sospiża, kelliem għall-Pulizija kkonferma li l-Isptar ittieħdu b’kollox tliet persuni. Tnejn minnhom huma anzjani ta’ 63 sena u 72 sena t-tnejn li huma residenti ż-Żurrieq. Dawn iż-żewġ persuni sofrew xi ġrieħi waqt li kienu għaddejjin f’xi għelieqi.
Persuna oħra, raġel ta’ 45 sena residenti Ħal Kirkop li kien fil-kumpless fil-ħin tal-inċident kellu jittieħed l-Isptar minħabba xokk qawwi.
9:30 a.m: Il-maltemp ikompli jxekkel il-ħidma…
Hekk kif kompliet il-ħidma wara l-isplużjonijiet ta’ dalgħodu, dan is-sit jinsab infurmat li t-tfittxija tal-Membri tal-Protezzjoni Ċivili minn fuq il-post irriżultat fis-sejba ta’ katavru u assistiet persuna oħra li sofra ġrieħi.
Jidher li minbarra dawn iż-żewġ persuni ma kienx hemm persuni oħra involuti anke minħabba li skont il-protokolli fil-kumplessi tan-nar, dawk li jidħlu jkunu jridu jinfurmaw b’dan. L-anzjan iċċertifikat mejjet jidher li kienu l-uniku persuna li kien informa b’dan.
Ninsabu infurmati wkoll li minħabba l-periklu tal-maltempata, l-uffiċjali kellhom jissosspendu l-operazzjoni tagħhom għal xi ħin.
Aktar informazzjoni kif taslilna…
8:30 a.m: Raġel imut u ieħor l-Isptar
Dan is-sit jinsab infurmat li l-uffiċjali rnexxielhom isibu r-raġel li kien fil-post fil-ħin tal-isplużjonijiet. Ninsabu infurmati wkoll li sfortunatament huwa ma weriex sinjali ta’ ħajja.
Ninsabu infurmati wkoll li xi bidwi li kien għaddej mill-viċinanzi kellu jittieħed l-Isptar Mater Dei minħabba xi ġrieħi li sofra.
Nifhmu li l-uffiċjali tal-Protezzjoni Ċivili għadhom għaddejjin f’operazzjoni delikata f’aktar tfittxija fuq il-post u biex ikunu wkoll jistgħu jeliminaw kull periklu.
8:00 a.m: Tfittxija għal persuna li għadha ma nstabitx
Sorsi qrib talk.mt infurmawna li minnufih bdiet ħidma delikata anke minħabba splużjonijiet sussegwenti li għalkemm ikunu iżgħar xorta jkunu ta’ periklu għall-uffiċjali tal-forzi tal-ordni.
Sfortunatament jidher li hemm persuna li għadu ma nstabx minn fost dawk li kienu fil-post, filwaqt li mill-inqas persuna oħra li kienet fil-post qabel l-inċident jidher li rnexxielu joħroġ.
7:30 a.m: Splużjonijiet fil-kumpless tan-nar San Ġużepp Ħal Kirkop
Ftit tal-ħin ilu nstemgħet splużjoni minn diversi żoni ta’ Malta. L-ewwel informazzjoni jidher li din seħħet fil-kumpless tan-nar San Ġużepp ta’ Ħal Kirkop li jinsab fiż-żona magħrufa bħala Misraħ Ħlantun.
Il-pulizija u l-ħaddiema tat-tifi tan-nar jinsabu fil-post u bdew minnufih bil-ħidma tagħhom. Fil-post hemm ukoll numru ta’ ambulanzi u timijiet mediċi mill-Isptar Mater Dei.
S’issa għadu mhux magħruf xi kkawża l-isplużjoni, u lanqas jekk kienx hemm persuni li ndarbu f’dan l-inċident.
Intant ftit tal-minuti wara l-isplużjonijiet il-Ministru għall-Intern u s-Sigurtà Nazzjonali Byron Camilleri kkonferma l-aħbar.
Aktar informazzjoni kif taslilna…
