F’tentattiv iddisprat, il-club tal-Arabja Sawdija, Al-Ittihad, jinsab lest li jħallas £200 miljun għall-firma taż-żewġ players internazzjonali ta’ Liverpool, id-difensur Ingliż Joe Gomez u l-attakkant Eġizzjan Mohamed Salah.
Meta fadal sa nhar il-Ġimgħa biex jintemm is-suq tat-trasferimenti, il-club Sawdi qed jagħmel dak kollu fil-poter tiegħu biex jakkwista lil dawn iż-żewġ players.
Iżda Liverpool inqabdu fuq sieq waħda fis-suq tat-trasferimenti minħabba li wara li telqulhom tmien players, huma ffirmaw tlieta biss.
L-iskwadra tagħhom hija ferm qasira u biex iċedu lil dawn iż-żewġ players iridu jaħdmu kontra l-ħin biex jiffirmaw is-”sostituti” tagħhom minbarra miri oħrajn.
Fil-veritá se tkun diffiċli għar-Red minħabba li ftit huma dawk il-clubs li se jċedu l-players tagħhom ladarba ngħata bidu għall-kampjonat.
Fuq nota oħra, id-difensur internazzjonali Olandiż, Virgil van Dijk, jista’ jeħel sospensjoni ta’ erba’ logħbiet.
Huwa weħel partita waħda meta tkeċċa fir-rebħa ta’ 2-1 kontra Newcastle United.
Iżda l-eks referee, Howard Webb, qed jitlob lill-Assoċjazzjoni tar-Referees biex id-difensur tar-Reds jingħata sospensjoni ta’ tliet logħbiet oħra għall-attakki verbali lejn ir-referee John Brooks.
