Kif għażilt il-basketball fost tant sport ieħor?
Tista’ tgħid li l-parteċipazzjoni tiegħi fl-isport minn etá żgħira kienet waħda awtomatika.
Missieri u ommi t-tnejn kienu midħla fix-xena tal- volleyball u n-nannu, il-famuż Sammy Nicholl, kien jilgħab il-football ma’ Sliema Wanderers kif ukoll mal-Pick Malta u kellu karriera mżejna mhux ftit.
B’hekk, ta’ erba’ snin, kont bdejt il-football. Fl- istess żmien, l-iskola l-ikbar ħabib li kelli kien it-tifel ta’ Dr Ivan Riolo, il-coach ta’ Starlites.
Ta’ kull nhar ta’ sibt, kien jiġbor lili u lil ħija, u dlonk konna inqattgħu nofs ta’ nhar nilagħbu l-basketball flimkien ma’ wliedu. Matul iż-żmien, in-namra li kelli lejn il-basketball għelbet l-isport l-ieħor li kont nagħmel, u ta’ 14-il sena ddeċidejt li niffoka fuqu.
Kif tiddeskrivi dan l-istaġun tiegħek ma’ Starlites?
Dan l-istaġun huwa wieħed ferm sabiħ għat-team tagħna. Il-ħames timijiet għandhom varjetá ta’ players, kemm barranin, kif ukoll lokali.
Id-differenza li nara fit-team tagħna hu li l-club investa ħafna fin-nursery matul dawn l-aħħar snin, bir-riżultat li llum qed naraw ħafna żgħażagħ jmissu l-court fl-ewwel diviżjoni.
Ninsab kburi li jiena wieħed minn dawk li tlajt min-nursery u bħali hemm ukoll li għandhom futur promettenti wkoll.
It-team qed juri prestazzjoni tajba u kull ġimgħa qed naraw żvilupp u progress. Li jkollok team żgħir ifisser li dejjem hemm x’titgħallem u spazju biex tikber fil-logħba. Kienet ta’ sfortuna kbira għalina li f’dawn l-aħħar sentejn, l-istaġun kellu jintemm kmieni għax konna għaddejjin b’ritmu tajjeb.
Kif jirnexxielek tlaħħaq mal-studju tiegħek, u mat-taħrig u l-logħob li jkollok?
Ommi u missieri għallmuni nkun iddixxiplinat f’kollox.
Importanti li tkun taf tqassam il-ħin u ssib bilanċ bejn l-istudju u t-taħriġ. Ta’ kull ġimgħa nagħmel pjan u nipprova nwettaq dak kollu li għandi nagħmel.
Ma tantx huwa faċli meta tkun tistudja, taħdem, tikkowċja u tittrenja imma nagħmel mill-aħjar biex inlaħħaq ma’ kollox. Li jgħin żgur hu li ma nħallix l-affarijiet għall-aħħar u nipprova nispiċċahom minnufih.
X’kienu l-esperjenzi li kellek sa issa mat-team nazzjonali tal-basketball?
L-ewwel esperjenza tiegħi kienet fl-2014 meta rbaħna l-midalja tad-deheb fil-kategorija ta’ Taħt is-16-il sena. Minn dak iż-żmien, iffurmajt parti mit-team tal-U18, tal-U20 kif ukoll mal-kbar.
L-iktar esperjenzi memorabli kienu tal-U20 fl-2017 meta lgħabna fid-Diviżjoni B tal-Ewropej, fir-Rumanija u l-logħob tal-Pajjiżi ż- Żgħar fl-2019, il-Montenegro.
Dawn inqishom bħala l-isbaħ esperjenzi għax kien hemm livell għoli ta’ basketball u differenti ħafna minn dak li naraw lokali. Is-sajf li għadda ffurmajt parti mit-team nazzjonali tal-kbar li kiseb il-midalja tal-bronż fl-Irlanda.
Player tal-kalibru tiegħek ġieli kkunsidra li jmur jilgħab barra minn Malta?
Hija l-ħolma ta’ kull player li jilgħab barra minn xtutna. Dawn l-aħħar sentejn kelli diversi opportunitajiet biex immur imma iddeċidejt li nispiċċa il-kors tal-Universitá qabel ma nibda avventura ġdida.
Il-pjan tiegħi hu li mmur nilgħab barra minn xtutna fis-sajf li ġej.
X’tikkummenta fuq il Malta Basketball Association mmexxija mill-president Pawlu Sultana?
Il-basketball hawn Malta mexa ħafna ‘l quddiem f’dawn l-aħħar snin bis-saħħa ta’ Pawlu Sultana u s-segretarju tal-MBA Joseph Muscat.
Investew ħafna fl-akkademja b’diversi coaches barranin li żviluppaw ix- xogħol li jibda min-nurseries. Bla dubju, dejjem għad hemm xi jsir u nħossni grat li jien ukoll nifforma parti minn dan it-team ta’ coaches.
X’tikkummenta fuq ir- riżorsi u l-court il-ġdid fil-padiljun f’Ta Qali li fihom tilagħbu f’Malta speċjalment meta kkumparati ma’ dawk li tilagħbu fihom barra minn Malta mat-tim nazzjonali?
Minkejja li l-isport tal- basketball hawn Malta huwa kemmxejn żgħir, xorta għandna padiljun attrezzat fuq livell internazzjonali u jikkumpara tajjeb ma’ dak li nilagħbu fihom barra. Barra minnhekk, min irid jitħarreġ għandu l-faċilitajiet biex iżur it-training courts matul il-ġurnata biex itejjeb il-livell tiegħu.
Kemm taħseb li l-media f’Malta tagħti biżżejjed pubbliċità lill-basketball?
Grazzi lit-team ta’ ġurnalisti li ikun dejjem preżenti fil-padiljun, il-logħob tal-basketball jingħata pubbliċitá fuq il-gazzatti lokali, siti elettroniċi, kif ukoll programm fuq it-televiżjoni ddedikat kollu għall-basketball.
Minkejja dawn l-isforzi, il-basketball dejjem jibqa’ inqas popolari mill-football u b’hekk inħoss li jkun tajjeb kieku jkun hemm iktar nies involuti fil-marketing ta’ dan l-isport. B’hekk inkunu nistgħu nattiraw aktar sponsors u l-isport ikun jista’ jikber.
Taħseb li għad jiġi żmien f’Malta meta player tal- basketball f’Malta kemm fil-kamp maskili kif ukoll fil-kamp femminili jkun jista’ jgħix esklussivament permezz tal-basketball?
Biex inżid ma dak li għadni kif għidt, jekk m’hemmx biżżejjed pubbliċitá ma jkunx hemm biżżejjed fondi biex player Malti jista’ jitħallas u jgħix bħala player professjonali. Barra minn hekk, biex dan iseħħ, il-clubs iridu jinvestu fi struttura professjonali biex ikunu jistgħu jakkomodaw l-iżvilupp tal-players.
Kif qed tħares lejn il-futur tiegħek bħala player?
Il-filosofija tiegħi hi li dak li tiżra, taħsad. Din hija mentalitá li nipprattika f’kollox. Fuq livell personali, l-opportunitajiet, kemm lokali u kif ukoll internazzjonali, qegħdin hemm u sta għalija li naħdem għalihom.
Ta’ kuljum nitħarreġ biex niżviluppa fil-logħba u nkun nista’ nikkontribwixxi bħala player Malti. Għandi responsabbiltá li, kemm bħala player kif ukoll bħala coach, u fuq kollox bħala bniedem, inkun ta’ eżempju tajjeb u role model għal dawk it-tfal kollha li jsegwu l-logħba.
… u tat-team ta’ Starlites?
Futur eċċitanti, speċjalment meta nara li mill-2014 ksibna ħafna unuri fil-katergoriji tan-nursery kollha. Ta’ kull sena, in-numru ta’ unuri qed jiżdied. Barra minn hekk, in-numru ta’ parteċipanti fin-nursery qed jikber ukoll, tant, li kellna ndaħħlu żewġ timijiet f’kull kategorija tas-subien. Kburi li nikkowċja u nagħti sehmi fit-taħriġ.
Tixtieq tgħaddi xi ringrazzjamenti partikolari?
Ma wasaltx fejn wasalt li kieku ma kienx hemm il-familja timbuttani u tissapportjani f’kull mument u f’kull deċiżjoni li ħadt fil-karriera tiegħi. Nirringrazzja ukoll lil Dr Ivan Riolo li bdieni f’dan l-isport tant sabiħ!
Tista’ tgħaddi messaġġ lil dawk li jixtiequ jagħmlu karriera fil-basketball?
L-iktar ħaġa mportanti hi li tieħu gost tagħmel dak li tkun qed tagħmel. Kif dan iseħħ, it-taħriġ, minkejja li xi kultant ikun diffiċli u ma jkollokx aptit, ma jibqax jidher bħala sagrifiċju, iżda pass ieħor importanti fl- iżvilupp tiegħek bħala player.
Qatt ma taf biżżejjed u qatt ma tista’ tittrejna biżżejjed. Għalhekk inħeġġeġ lit-tfal kollha biex jieħdu gost jilagħbu l-logħba daqstant sabiħa, għaliex dak huwa l-uniku mod biex tiżviluppa dedikazzjoni, impenn u perseveranza.
