L-attakkant ta’ Barcelona, Ansu Fati, riċentement ġie offrut lill-aqwa clubs madwar l-Ewropa mill-aġent Jorge Mendes.
Wara li tela’ mill-gradi tal-famuża akkademja La Masia ta’ Barcelona, Fati għamel id-debutt tiegħu għat-team tal-kbar fl-età ta’ 16-il sena biss fl-2019.
L-istaġun li għadda l-Ispanjol irnexxielu jagħmel biss seba’ dehriet fil-La Liga wara li sofra injuries serji fl-irkoppa, iżda dan l-aħħar reġa’ lura għat-taħriġ wara 10 xhur barra mill-azzjoni.
Mendes kien qed jittama li jmexxi ‘l quddiem żieda sinifikanti fis-salarju fit-tiġdid tal-kuntratt qabel ir-ritorn tiegħu mal-ewwel team, f’każ li l-klijent tiegħu jitħabat biex jerġa’ lura għall-forma preċedenti tiegħu.
Il-prodott ta’ La Masia tpoġġa fit-tieqa tat-trasferimenti mill-aġent Mendes, hekk kif jidher li kien qed ibeżża’ lill-ġganti Spanjoli biex iżidu l-offerta kuntrattwali tagħhom għall-klijent tiegħu.
Manchester City huma wieħed mill-clubs li ġew ikkuntattjati, iżda l-manager Pep Guardiola rrifjuta li jissanzjona l-ftehim minħabba r-relazzjonijiet qawwija tiegħu ma’ Barcelona, speċjalment mal-president, Joan Laporta.
Fati għamel 41 dehra għall-ewwel team ta’ Barcelona b’kollox, u skorja 13-il goal.
